ქართული ოცნების აღმასრულებელმა მდივანმა, ირაკლი კობახიძემ პრემიერმინისტრობის კანდიდატებზე საუბრისას განაცხადა, რომ მმართველ გუნდს ერთადერთი ძლიერი და ღირსეული პრემიერმინისტრობის კანდიდატი ჰყავს. მისი თქმით, "ბუზი ბევრი ბზუის, მაგრამ გახარიასთან ყველა ტყუის".

"ის არის არა მხოლოდ კანდიდატი, არამედ მომავალი პრემიერმინისტრი ჩვენი ქვეყნის, რომელიც უზრუნველყოფს იმას, რომ ქვეყანა დაძლევს პანდემიიდან გამომდინარე პრობლემებს, უახლოეს მომავალში, მაქსიმუმ, ერთ წელიწადში და ამის შემდეგ ჩვენ გვექნება ძალიან სწრაფი ტემპით ეკონომიკური განვითარება", — განაცხადა კობახიძემ.

ქართული ოცნების პრემიერიმინისტრობის კანდიდატი გიორგი გახარიაა. ნაციონალურმა მოძრაობამ და ძალა ერთობაშიამ ყოფილი პრეზიდენტი, მიხეილ სააკაშვილი წარადგინეს, ლელომ — მამუკა ხაზარაძე. ამასთან, გიორგი ვაშაძე მთავრობის მეთაურად საკუთარ თავს მოიაზრებს. რაც შეეხება ევროპულ საქართველოს, მათ კანდიდატი არ დაუსახელებიათ.