ლელოს მაჟორიტარი დეპუტატობის კანდიდატი რუსთავში, გრიგოლ გეგელია, ეხმაურება საიას ანგარიშს და აცხადებს, რომ დოკუმენტის მიხედვით წინასაარჩევნო პერიოდში მუქარისა და ძალადობის ყველაზე მეტი შემთხვევა ლელოს წევრების მიმართ დაფიქსირდა. გეგელია ამბობს, რომ ქართული ოცნების მმართველობის წლებში სახელმწიფომ ვერავითარი წინსვლა ვერ განიცადა.

"ამ ხელისუფლებამ შეინარჩუნა ყველა ის მავნე პრაქტიკა, მათ შორის, პოლიტიკური ოპონენტების დევნა, რასაც ქართული საზოგადოება წლების განმავლობაში ეწინააღმდეგებოდა. ქართული ოცნება დაშინებულია ჩვენი სწრაფი ზრდით და ჩვენ ამას ყოველდღე ვხედავთ. თუმცა, ამაში გასაკვირი არაფერია, რადგან დღეს ლელო არის ერთადერთი პარტია მზარდი ორნიშნა რეიტინგით. ჩვენი პროგრამა, "მარშალის გეგმა", საზოგადოების ფართო სპექტრმა აღიარა, როგორც ეკონომიკური, სოციალური და პოლიტიკური განვითარების უალტერნატივო გეგმა", — აცხადებს გეგელია.

მისივე განმარტებით ლელო საუბრობს ქვეყნის მომავალზე და განვითარებაზე, ორპარტიულობის შენარჩუნებაზე ორიენტირებული ქართული ოცნება კი ისევ წარსულს არის ჩაფრენილი.

"ხელისუფლებას ყველაზე მეტად სწორედ ლელოს არსებობა უქმნის დისკომფორტს, რადგან დღეს მხოლოდ ლელოს შეუძლია ორპარტიულობის დასრულება და ქართული პოლიტიკის განახლება", — აღნიშნა გეგელიამ.