საქართველოში აზერბაიჯანის საელჩოს წარმომადგენლებმა თბილისში გამართულ პრესკონფერენციაზე სომხეთი ჰუმანიტარული მიზნით ცეცხლის შეწყვეტის შეთანხმების დარღვევაში დაადანაშაულეს და რეგიონში განვითარებულ მოვლენებზე პასუხისმგებლობა ერევანს დააკისრეს. საქართველოში აზერბაიჯანის ელჩის მრჩევლის, ელდარ ბაირამოვის განცხადებით, ჰუმანიტარული მიზნით ცეცხლის შეთანხმების ამოქმედებისთანავე სომხურმა მხარემ უხეშად დაარღვია ის და მათ ტერიტორიებზე იერიში გააგრძელა. მან საერთაშორისო თანამეგობრობასა და მეზობელს ქვეყნებს სთხოვა, აზერბაიჯანის პოზიციისადმი საერთაშორისო სამართალზე დაყრდნობით რეალური მხარდაჭერა გამოხატონ.

"დაიბომბა აზერბაიჯანის სიდიდით მეორე ქალაქი განჯა, როგორც თქვენთვის ქუთაისია. შედეგად, 9 მშვიდობიანი მოქალაქე დაიღუპა 34 დაიჭრა, მათ შორის არიან ქალები და ბავშვები. ჩვენ ვგმობთ სომხეთის აგრესიულ ქმედებებს. ასევე, საერთაშორისო თანამეგობრობას რეაგირებისკენ მოვუწოდებთ, რათა სომხეთი საერთაშორისო სამართლის ნორმებს დაემორჩილოს", — განაცხადა ელდარი ბაირამოვმა.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე არიან შეთანხმებული. შეთანხმება ძალაში 10 ოქტომბრის, 20:00 საათიდან უნდა შესულიყო.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

ბოლო მონაცემებით ბრძოლები რამდენიმე სხვადასხვა ლოკაციაზე მიმდინარეობს, ყველაზე აქტიური მათ შორის ყარაბაღის სამხრეთ და ჩრდილოეთ ნაწილებია. გარდაცვლილთა საერთო რიცხვი, როგორც სამხედროებს, ასევე, სამოქალაქო პირებს შორის რამდენიმე ასეული ადამიანია. აღსანიშნია, რომ აზერბაიჯანი გარდაცვლილ სამხედროებზე ინფორმაციას არ ავრცელებს, მაშინ, როცა სომხური მხარე აცხადებს, რომ მოწინააღმდეგეს ასეულობით ჯარისკაცი მოუკლა. თვითაღიარებული არცახის რესპუბლიკის (ყარაბაღი) პრეზიდენტის განცხადებით, განადგურებულია ცალკეული ქალაქებისა და სოფლების ინფრასტრუქტურა.