ევროპული საქართველოს მაჟორიტარი დეპუტატობი კანდიდატი ვაკისა და საბურთალოს ოლქში, ელენე ხოშტარია, დავით გარეჯის საქმეზე ივერი მელაშვილისა და ნატალია ილიჩოვას პატიმრობაში დატოვებას ეხმაურება. ხოშტარიას თქმით, ამ ადამიანების დაჭერა გავს შავზე თეთრის მტკიცებას. დეპუტატობის კანდიდატმა აღნიშნა, რომ მთელი სასამართლო პროცესი გაჟღენთილი იყო უსამართლო აბსურდით.

"სახლში შემოსვლისთანავე რაღაც სიმშვიდეს ხო გრძნობ ადამიანი? აი თითქოს ცდილობ გარეთ დატოვო ნეგატიური ემოცია. დღეს რომ შემოვედი მივხვდი, რომ შეუძლებელია დატოვო ის განცდა, რომ ის ორი უდანაშაულო ადამიანიც ეხლა სახლში უნდა იყოს და არ არის. პირველი ღამე აქვთ ციხეში. წარმოვიდგინე რა სახით იყურებიან, ან რას გრძნობენ მათთვის სრულიად უცნობ, უცხო და მათთან არანაირ კავშირში მქონე პროცედურები რომ უნდა გაიარონ? რადგან ციხეში ნამყოფი ვარ დაახლოებით ვცდილობ წარმოვიდგინო გარემო და მათი ემოცია.

ეს განცდა კიდევ უფრო გამიმწვავდა იმიტომ, რომ დღეს, სასამართლოზე, როცა ივერი ლაპარაკობდა, ვუყურებდი ნატალიას, რომელიც ძალიან შეუმჩნეველი ჟესტებით, ხან შეხებით, ხან გახედვით ცდილობდა ივერის გამხნევებას და თან თვალებში შეციცინებდა მის ვაჟკაცობას. ხოდა მთელი ეს სცენა იყო: რა შუაშია ეს ხალხი აქ ამ სკამზე, ამ ბადრაგთან, ამ აბსურდში? აი გაჟღენთილი იყო იქაურობა ამ უსამართლო აბსურდით.

ხოდა, კიდე მთელი ცხოვრებაა ვფიქრობ, 37 წელს როგორ ხდებოდა ამდენი ხალხის დაჭერა? ვინ იჭერდა, ვინ ასრულებდა, ვინ "აპრავებდა"? ხო ხედავდენ რომ აბსურდი იყო, ეს ხალხი ხომ ამ პატარა ქვეყანაში გვერდიგვერდ ცხოვრობდა მაინც, ხვდებოდნენ კიდეც სადღაც ერთმანეთს და როგორ წირავდენ ესე? რაც უფრო დრო გადის უფრო და უფრო ვრწმუნდები, რომ სრულიად წარმოსადგენია ეს ყველაფერი. შავზე თეთრს რომ გიმტკიცებენ და გარშემო რომ ვითომ არ იმჩნევენ.

ვერ შედგება ეს სახელმწიფო, ვერ ვიცხოვრებთ მშვიდად, სანამ ამ საშინელ, უკვე გამჯდარ ტრადიციას არ მოვისვრით", — აცხადებს ხოშტარია.