ამერიკის შეერთებული შტატების რიგით მეორე საპრეზიდენტო დებატები ვირტუალურად გაიმართება. ამის შესახებ ინფორმაციას Reuters ავრცელებს.

მოქმედი პრეზიდენტი, დონალდ ტრამპი დემოკრატ კანდიდატს, ჯო ბაიდენს 15 ოქტომბერს დაუპირისპირდება. საპრეზიდენტო დებატების კომისიის განცხადებით, ეს გადაწყვეტილება ყველა მონაწილე პირის უსაფრთხოების მიზნით მიიღეს.

მედიის ცნობით, ტამპმა განაცხადა, რომ მისთვის ვირტუალური დებატები მიუღებელი ფორმატია, ამიტომ იგი მასში მონაწილეობაზე უარს ამბობს.

ამერიკის დროით 29 სექტემბერს აშშ-ს პირველი საპრეზიდენტო დებატები შედგა. რამდენიმე დღის შემდეგ კი, კერძოდ, 2 ოქტომბერს ცნობილი გახდა, რომ ამერიკის პრეზიდენტსა და პირველ ლედის კორონავირუსი დაუდასტურდათ.