სრულიად საქართველოს კათოლიკოს-პატრიარქი, ილია მეორე სომხეთის ელჩს შეხვდა. როგორც საპატრიარქოს ოფიციალურ ვებგვერდზე წერია, შეხვედრა დღეს, 7 ოქტომბერს საქართველოში სომხეთის ელჩის ინიციატივით შედგა. ხანმოკლე შეხვედრის დროს საუბარი ყარაბაღის რეგიონში არსებულ ვითარებას შეეხო.

საქართველოს ეკლესიის მხრიდან შეხვედრას ესწრებოდნენ საპატრიარქო ტახტის მოსაყდრე, მიტროპოლიტი შიო (მუჯირი), ახალციხისა და ტაო-კლარჯეთის მიტროპოლიტი თეოდორე (ჭუაძე), კათოლიკოს-პატრიარქის მდივანი, დეკანოზი მიქაელ ბოტკოველი და საპატრიარქოს საზოგადოებასთან ურთიერთობის სამსახურის ხელმძღვანელი დეკანოზი ანდრია ჯაღმაიძე.

სრულიად საქართველოს კათოლიკოს-პატრიარქმა ორივე მხარეს მსხვერპლთა გამო წუხილი გამოთქვა და აღნიშნა, რომ კონფლიქტის დროულად დასრულებისა და მშვიდობისათვის ლოცულობს.