ევროპული საქართველოს მაჟორიტარი დეპუტატობის კანდიდატი თელავის, ახმეტის, ყვარლისა და ლაგოდეხის ოლქში, ზურაბ ჭიაბერაშვილი, პრემიერმინისტრ გიორგი გახარიას განცხადებას ეხმაურება, რომელმაც განაცხადა, რომ ვირუსის მართვასთან დაკავშირებით პრობლემები არ არის, მაგრამ, ჯანდაცვის სისტემის რესურსი არ არის შეუზღუდავი.

ჭიაბერაშვილის თქმით, გახარიას ამ განცხადებამ გამოავლინა, რომ ქართული ოცნების განცხადება მთავრობის მიერ კორონაკრიზისის ეფექტიანი მმართვის შესახებ თავიდანვე იყო აბსოლუტური ილუზია და მითი.

"გახარიას განცხადებამ პირდაპირ გამოავლინა ის, რომ აბსოლიტური ილუზია და მითი იყო თავიდანვე ქართული ოცნების განცხადება მთავრობის მიერ კორონაკრიზისის ეფექტიანი მართვის შესახებ. ჩვენ დღეს მკაფიოდ ვხედავთ, რომ საქართველოს მთავრობამ და ჯანდაცვის სამინისტრომ ვერ უზრუნველყო სამედიცინო სექტორის სათანადო მომზადება ინფიცირებულთა რიცხვის მატებისათვის და გახარიას განცხადება, რომ სამედიცინო სექტორის რესურსი არ არის შეუზღუდავი პირდაპირი მინიშნებაა, რომ ჩვენ შეიძლება მათი არასწორი ქმედების გამო აღმოვჩნდეთ სიტუაციაში, როდესაც საქართველოს მასშტაბით არ იქნება სამედიცინო სექტორში საკმარისი საწოლები, შეიძლება, სასუნთქი აპარატები და ეს პირდაპირი ვალდებულებაა ივანიშვილის მთავრობის", — აცხადებს ზურაბ ჭიაბერაშვილი.