საქართველოს ეკონომიკისა და მდგრადი განვითარების მინისტრის, ნათია თურნავას განცხადებით, საქართველოს გავლით სამოქალაქო დანიშნულების სატრანზიტო ტვირთების გადაზიდვა როგორც აზერბაიჯანთან, ასევე სომხეთთან შეუფერხებლად მიმდინარეობს. ამის შესახებ მან ეროვნული უსაფრთხოების საბჭოს სხდომის შემდეგ ისაუბრა.

"ამაზე მეტყველებს სტატისტიკაც — კონფლიქტის განახლების მომენტიდან, სამოქალაქო დანიშნულების ტვირთით დატვირთული მანქანების საზღვრის კვეთის სტატისტიკა პრაქტიკულად არ შეცვლილა. სამოქალაქო ტვირთით დატვირთული დაახლოებით 750-დან 800-მდე სატვირთო ავტომობილი ყოველდღიურად კვეთს საქართველო-აზერბაიჯანის და საქართველო-სომხეთის საზღვრებს", —- განაცხადა თურნავამ.

მისივე თქმით, კონკრეტულად სომხეთის სამოქალაქო ტვირთების გადაზიდვების უფრო მეტად უსაფრთხო და გამართული ფუნქციონირებისთვის ამოქმედდა საბაჟო-გამშვები პუნქტი ნინოწმინდა-ბავრა.

"ინტენსივობა მაღალია, კვეთები მაღალია და ამ კუთხით რაიმე შეფერხებას ადგილი არ აქვს და არც ექნება. ასევე დავამატებ, რომ სამოქალაქო დანიშნულების ტვირთების სატრანზიტო გადაზიდვები საჰაერო გზებითაც შეუფერხებლად ხორციელდება. კონფლიქტის განახლების მომენტიდან ჩვენ რაიმე შეზღუდვა ამ კუთხით არ დაგვიწესებია და არც ვაპირებთ, რომ დავაწესებთ. მთლიანობაში, იმედს გამოვთქვამთ, რომ რეგიონში მშვიდობა მალე აღდგება და ეს არის ჩვენთვის სასიცოცხლოდ მნიშვნელოვანი", — განაცხადა ნათია თურნავამ.

დღესვე, ეროვნული უსაფრთხოების საბჭოს სხდომის შემდეგ, ცნობილი გახდა, საქართველომ დროებით შეაჩერა ნებართვების გაცემა სამხედრო ტვირთების გატარებაზე აზერბაიჯანისა და სომხეთის მიმართულებით.