ამერიკულ-ქართული განათლების ცენტრის ორგანიზებით და ესპანურ IE University-სა და რუმინულ Babeş-Bolyai University-სთან თანამშრომლობით 2020 წლის 10 ოქტომბერს, 12:00-დან 18:00 საათამდე გაიმართება განათლების საერთაშორისო ვირტუალური გამოფენა, რომელიც უმასპინძლებს 22 უნივერსიტეტს 13 ქვეყნიდან. ყველა დაინტერესებულ პირს გამოფენაზე შეეძლება მიიღოს ამომწურავი ინფორმაცია უნივერსიტეტისა და მისი პროგრამების შესახებ. მათ შეეძლებათ პირადად დაუკავშირდნენ უნივერსიტეტის წარმომადგენლებს და დაუსვან მათთვის საინტერესო კითხვები.

განათლების ვირტუალური გამოფენაში მონაწილეობის მისაღებად საჭიროა გაიაროთ რეგისტრაცია შემდეგ ბმულზე: leafonlinefair.com

Pennsylvania College of Technology (PCT) არის საჯარო კოლეჯი აშშ-ში, ქალაქ ვილიამსპორტში, პენსილვანიის შტატში. ის არის პენსილვანიის სახელმწიფო უნივერსიტეტთან ასოცირებული, მაგრამ მისგან დამოუკიდებელი საგანმანათლებლო დაწესებულება. PCT-ს ასევე მოიხსენიებენ როგორც Penn College.

პენსილვანიის ტექნოლოგიის კოლეჯის ისტორია იწყება 1914 წლიდან, როდესაც ვილიამსპორტის უმაღლეს სკოლაში (High School) დაინერგა პროფესიული კურსები ხეზე მუშაობის მიმართულებით. 1918 წლიდან კურსებზე ზრდასრულთა მიღებაც დაიწყეს და წლების განმავლობაში სხვადასხვა პროფესიული კურსი დაინერგა. 1941 წელს ვილიამსპორტის ტექნიკური ინსტიტუტი დაარსდა, რომელშიც გაერთიანდა სკოლაში შემავალ მოსწავლეთა და ზრდასრულთა პროფესიული კურსები. 1965 წელს ინსტიტუტი გადაკეთდა ვილიამსპორტის რეგიონალურ საზოგადოებრივ კოლეჯად (Williamsport Area Community College - WACC), ხოლო 1989 წლიდან ატარებს დღევანდელ სახელს.

PCT-ში დიდი ყურადღება ეთმობა პრაქტიკულ სწავლებას, რათა სტუდენტებმა მიიღონ რეალური ცხოვრებისათვის საჭირო უნარები და ცოდნა. უნივერსიტეტის პროგრამები არის საბაკალავრო დონის. გამონაკლისია საექთნო სამაგისტრო პროგრამა და ექიმის ასისტენტის კომბინირებული საბაკალავრო და სამაგისტრო პროგრამა.

პენ კოლეჯი შედგება 3 სკოლისაგან:

ბიზნესის, ხელოვნებისა და მეცნიერებების სკოლა, რომელშიც ისწავლება ფინანსური აღრიცხვა, ბიზნესის ადმინისტრირება, სახელმწიფო უსაფრთხოება, გრაფიკული დიზაინი, ლუდის ხარშვის ტექნოლოგია და სხვა.

საინჟინრო ტექნოლოგიების სკოლა, სადაც ისწავლება ისეთი მიმართულების პროგრამები როგორიც არის საავტომობილო ტექნოლოგიები, არქიტექტურა და მდგრადი დიზაინი, მშენებლობა, წარმოება, ავიაცია, ინჟინერია, საინფორმაციო ტექნოლოგიები, კომპიუტერული ინჟინერია და სხვა.

საექთნო და ჯანდაცვის მეცნიერებების სკოლა — ისწავლება სტომატოლოგია, საექთნო საქმე, რადიოგრაფია, ქირურგიული ტექნოლოგიები და სხვა.

სტუდენტებს აქვთ შესაძლებლობა, ძირითად სპეციალობასთან (მეიჯორი) ერთად, აირჩიონ მაქსიმუმ 2 მეორადი სპეციალობა (მაინორი).

დისტანციურად სწავლის მსურველთათვის პენ კოლეჯს 11 სხვადასხვა სპეციალობის პროგრამა აქვს.

კოლეჯი პროგრამა Penn College NOW-ის მეშვეობით დამამთავრებელი კლასების მოსწავლეებს შესაძლებლობას აძლევს, მიიღონ პენსილვანიის ტექნოლოგიის კოლეჯის კრედიტები სხვადასხვა ტექნოლოგიურ ცენტრსა და სკოლაში, პენსილვანიის შტატში.

პენ კოლეჯში სწავლის საფასური დამოკიდებულია კრედიტების რაოდენობაზე. სწავლის ღირებულებისა და დამატებითი ხარჯების ჩათვლით ერთი კრედიტის ფასია $839. წლიური გადასახადი $30 000-ის ფარგლებში მერყეობს და დამოკიდებულია არჩეულ პროგრამაზე. დისტანციურ პროგრამაზე სწავლის შემთხვევაში ერთი კრედიტის ღირებულებაა $504.

კოლეჯი სტუდენტებს აძლევს საშუალებას, მოიპოვონ სტიპენდია და შეამცირონ სწავლის ხარჯები.

თქვენ გაქვთ შესაძლებლობა პირადად შეხვდეთ პენსილვანიის ტექნოლოგიის კოლეჯის წარმომადგენელს განათლების საერთაშორისო ვირტუალურ გამოფენაზე 10 ოქტომბერს, 12 საათიდან 18 საათამდე. შემოგვიერთდით: leafonlinefair.com