ისრაელის კონტრტერორისტულმა ბიურომ გამაფრთხილებელი განცხადება გაავრცელა და მოუწოდა ისრაელელ და დასავლელ ტურისტებს, ინდოეთში ვიზიტისას თავი შეიკავონ საახალწლო ღონისძიებებზე დასწრებისგან, რადგან მაღალია ტერაქტების საფრთხე. ინფორმაციას ისრაელური საინფორმაციო სააგენტო Haaretz ავრცელებს.

გაფრთხილებაში წერია, რომ ტურისტებმა თავი უნდა მოარიდონ პლაჟებს, საშობაო ბაზრობებს, სავაჭრო ცენტრებს, ასევე, კლუბებსა და სხვა თავშეყრის ადგილებს მომეტებული რისკების გამო.

ისრაელის ხელისუფლება ასევე აფრთხილებს საკუთარ მოქალაქეებს, ინდოეთში მყოფი ნათესავები გააფრთხილონ მოსალოდნელი დივერსიების შესახებ.

როგორც Haaretz წერს, 2008 წელს ტერაქტების სერიას ინდოეთში 166 ადამიანი ემსხვერპლა, მათ შორის 5 ისრაელის მოქალაქე იყო. ინდოეთი როგორც საერთაშორისო, ისე ისრაელელი ტურისტებისთვის ერთ–ერთ ყველაზე პოპულარულ ქვეყნად რჩება. არსებული ინფორმაციით, ინდოეთს წელიწადში 20 ათასზე მეტი ყოფილი ისრაელელი სამხედრო სტუმრობს დასასვენებლად.