ადამიანის უფლებების სწავლებისა და მონიტორინგის ცენტრი (EMC) მარნეულში დაზარალებულ ჟურნალისტებს სამართლებრივ დახმარებას გაუწევს. ამის შესახებ EMC ოფიციალურ განცხადებას ავრცელებს.

"სამწუხაროდ, ბოლო დღეებში პოლიტიკურ პროცესებთან დაკავშირებით ძალადობის არაერთი მძიმე შემთხვევა დაფიქსირდა ამ რეგიონში. დაუშვებელია წინასაარჩევნო პროცესებში ძალადობრივი მიდგომების გამოყენება, მითუფრო ამ პროცესში საკრებულოს წევრების მონაწილეობა. საგანგაშოა, რომ მედიისა და სადამკვირვებლო ორგანიზაციის წარმომადგენლებს თავს მათ საქმიანობასთან დაკავშირებით დაესხნენ.
EMC სამართლებრივ დახმარებას უწევს დაზიანებულ ჟურნალისტებს. ჩვენი ადვოკატი მარნეულის პოლიციის განყოფილებაში გამოკითხვის პროცესებს დღესვე დაესწრება", — ნათქვამია განცხადებაში.

29 სექტემბერს, მარნეულში ქართული ოცნებისა და ნაციონალური მოძრაობის აქტივისტების დაპირისპირების შედეგად, რამდენიმე ადამიანი დაშავდა, მათ შორის ფიზიკურად გაუსწორდნენ ტელეკომპანია მთავარის ორი ჟურნალისტს და ორი ოპერატორს, ასევე საზოგადოებრივი მაუწყებლის ოპერატორს.