მენსტრუაციის სტიგმის დასამარცხებლად დაწყებული კამპანიის ფარგლებში, პანტონის ფერების ინსტიტუტმა წითლის ახალი ელფერი გამოუშვა.

კომპანიას მსოფლიო მასშტაბით ფერების უდიდესი სისტემა აქვს და მის გადაწყვეტილებებს მისდევს დიზაინის გლობალური ინდუსტრია — მოდა, გრაფიკული დიზაინი, პროდუქციის დიზაინი და ა.შ.

პანტონმა ახალი ფერის მისაღებად შვედურ ქალთა პროდუქტების ბრენდ Intimina-სთან ითანამშრომლა. ფერების ინსტიტუტში აცხადებენ, რომ ახალი ელფერი უფრო "აქტიური და თავისუფალი წითელია" და მისი დანიშნულებაა სიამაყე და თავდაჯერებულობა აგრძნობინოს იმ ადამიანებს, ვისაც მენსტრუაცია აქვთ.

Seen+Heard (დაინახე და მოუსმინე) — ასე ჰქვია კამპანიას, რომელიც ადამიანებს და არამხოლოდ ქალებს ახალისებს და აგულიანებს, რომ მენსტრუაციის შესახებ უფრო ღიად, თამამად და თავისუფლად ილაპარაკონ. ინტიმინაში ამბობენ, რომ ახალი ელფერი "წითლის ნამდვილი ელფერია, რომელიც მტკიცე ნაკადს გამოხატავს".

ფოტო: Pantone

პანტონის სისტემა 1963 წელს ამერიკაში ბეჭდურ სამყაროში ფერების შეხაემბის პრობლემის გადასაჭრელად შეიქმნა. დღეისთვის პანტონის სპექტრი 2 625 ფერს მოიცავს.

"ამ ფერის დანიშნულებაა თავდაჯერებულობა შეჰმატოს ქალებს, რათა იზეიმონ ის ძალა, რომლითაც დაიბადნენ", — თქვა პანტონის ფერების ინსტიტუტის ვიცე პრეზიდენტმა, ლორა პრისმენმა.

კამპანიის აღსანიშნავად, ინტიმინამ საქველმოქმედო ჯგუფს, ActionAid-ს დონაცია გადასცა. ჯგუფი სიღარიბეში მცხოვრებ ქალებსა და გოგოებს ეხმარება.

პანტონი ყოველ წელს წლის ფერს ასახელებს. 2020 წლის ფრად კლასიკური ლურჯი შეირჩა, თუმცა ეს მანამ მოხდა, სანამ მსოფლიოს კორონავირუსის პანდემია დაატყდებოდა თავს.

ამავე თემაზე: