ამერიკის შეერთებული შტატების სახელმწიფო დეპარტამენტი აცხადებს, რომ ისინი უმკაცრესად გმობენ ძალადობის ესკალაციას და სომხეთსა და აზერბაიჯანს საომარი მოქმედებების შეწყვეტისკენ მოუწოდებს.

დეპარტამენტის მიერ გავრცელებულ განცხადებაში ვკითხულობთ, რომ სახელმწიფო მდივნის მოადგილემ მოუწოდა აზერბაიჯანისა და სომხეთის საგარეო საქმეთა მინისტრებს, გამოიყენონ მათ შორის არსებული პირდაპირი საკომუნიკაციო არხები და თავიდან აიცილონ შემდგომი ესკალაცია.

"შეერთებული შტატები შეშფოთებულია მთიანი ყარაბაღის კონფლიქტის ზონაში მიმდინარე სამხედრო მოქმედებებით, რასაც მოჰყვა მსხვერპლი, მათ შორის, არიან მშვიდობიანი მოქალაქეებიც. ჩვენ ვუსამძიმრებთ დაღუპულთა და დაშავებულთა ოჯახებს", — აცხადებენ აშშ-ს სახელმწიფო დეპარტამენტში.

ამასთან, ამერიკის შეერთებულ შტატებს მიაჩნია, რომ ძალადობის ესკალაციაში გარე ძალების მონაწილეობა ხელის შემშლელია და მხოლოდ დაძაბულობის გამწვავებას უწყობს ხელს. განცხადებაში ვკითხულობთ, რომ აშშ მზად არის, დაეხმაროს მხარეებს კონფლიქტის მშვიდობიანი გზით მოგვარებაში.

27 სექტემბერს მთიან ყარაბაღში სამხედრო დაპირისპირება განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს. გთავაზობთ დღის განმავლობაში მიმდინარე მოვლენებს განახლებად რეჟიმში.

გაიგეთ მეტი: