თბილისის საქალაქო სასამართლოში უკვე დაიწყო თეთრი ხმაურის მოძრაობის მიერ 10 დეკემბერს, პარლამენტთან გამართულ აქციაზე დაკავებული ორი პირის, შოთა ხინჩაგაშვილისა და მირიან მალაყმაძის პროცესი.

აქტივისტებს სამართალდამცავები ადმინისტრაციულ სამართალდარღვევათა კოდექსის 173-ე მუხლის დარღვევას ედავებიან, რაც პოლიციელისადმი ბოროტ დაუმორჩილებლობას გულისხმობს. მოგვიანებით, 27 დეკემბერს, მათ კი კიდევ ერთი მუხლი, შეკრებისა და მანიფესტაციის წესის დარღვევა დაემატა, თუმცა, დღეს მხოლოდ 173-ე მუხლთან დაკავშირებული დარღვევის განხილვა მიმდინარეობს, რაც შეეხება მანიფესტაციის წესის დარღვევას, ეს პროცესი 3 იანვრისთვისაა ჩანიშნული. საქმეს მოსამართლე მერი გულუაშვილი განიხილავს.

ხინჩაგაშვილისა და მალაყმაძის ინტერესებს ადამიანის უფლებების სწავლებისა და მონიტორინგის ცენტრი (EMC) იცავს. ადვოკატმა მოსამართლისგან მოითხოვა ამ ორი ადმინისტრაციული სამართალდარღვევის საქმის გაერთიანება, თუმცა მოსამართლემ მისი შუამდგომლობა არ დააკმაყოფილა.

10 დეკემბერს, ადამიანის უფლებების დაცვის დღეს, ყოფილი პარლამენტის შენობის წინ აქცია დეკრიმინალიზაცია 2016 გაიმართა, სადაც შეკრებილები ნარკოტიკების მოხმარების დეკრიმინალიზაციას ითხოვდნენ.

მოძრაობის წევრები მიიჩნევენ, რომ ამ დღეს პოლიციამ აქციის მონაწილეებს თვითონ შეუზღუდა შეკრებისა და მანიფესტაციის უფლება და მათ ამ უფლების განხორციელების წესის დარღვევას ედავება:

"ეს მუხლი ხშირ შემთხვევაში მათ მიმართ გამოიყენება, ვინც მოქალაქეებს მანიფესტაციის უფლებას უზღუდავს და მონაწილეების წინააღმდეგ მისი გამოყენების პრაქტიკაზე დიდი ხანია ინფორმაცია არ გავრცელებულა".

თეთრი ხმაურის მოძრაობა აცხადებს, რომ არც ერთ მხარდამჭერს არ დატოვებს უსამართლო სისტემასთან პირისპირ.

On.ge-ს ჟურნალისტი სასამართლო დარბაზიდან აშუქებს ხინჩაგაშვილისა და მალაყმაძის პროცესს.