საზოგადოებრივი მაუწყებლის დირექტორობის კანდიდატმა, თინათინ ბერძენიშვილმა, BBC-ის მთავარი რედაქტორის, ტონი ჰოლის ფრაზა: "გახადე კარგი პოპულარული და პოპულარული — კარგი" მოიყვანა მაგალითად და აღნიშნა, რომ სწორედ ეს არის საზოგადოებრივი მაუწყებლის მისია.

ბერძენიშვილს ამ ფრაზის მაგალითად მოყვანა, მას შემდეგ დასჭირდა, რაც საბჭოს წევრმა მაუწყებლის 5 პროცენტიან რეიტინგზე დაუსვა კითხვა. გენერალური დირექტორობის კანდიდატის განცხადებით, რეიტინგის ციფრები რეალობას აცდენილია. მისი თქმით, არსებობს არა მხოლოდ, რეიტინგების სხვადასხვა მთვლელი, რომელიც განსხვავებულ მონაცემებს იძლევა, ასევე არსებობს უამრავი კრიტერიუმი, მათ შორის, სოციალურ მედიაში ჩართულობა, რითაც რეიტინგები ფასდება.

იმის განსამარტად, რომ რეიტინგის ეს მონაცემები რეალობას არ შეესაბამება, ბერძენიშვილმა ერთ-ერთი გასართობი გადაცემა მასტერშეფი მოიყვანა.

"მაგალითად, 30 ათასი წამში ნახვა "ლაივში" მასტერშეფის. გართობაა მესმის, მაგრამ გართობაც საზოგადოებრივი მაუწყებლის მოვალეობაა", — განაცხადა მან.

საბჭოს წევრმა მას ჰკითხა, რამდენად პასუხობს ეს მაუწყებლის გამოწვევას, როცა რეიტინგის ზრდა გასართობი ან სპორტული გადაცემების ხარჯზე უფრო მეტად ხდება, ვიდრე, მაგალითად, პოლიტიკურის ან საზოგადოებრივის. ბერძენიშვილის განმარტებით, ეს მხოლოდ გასართობი გადაცემების ხარჯზე არ ხდება, თუმცა გართობაც ისეთივე მნიშვნელოვანია, როგორც სხვა თემატიკა.

ამჟამად საზოგადოებრივ მაუწყებელში გენერალური დირექტორის პოზიციაზე შესარჩევი კონკურსი მიმდინარეობს. კონკურსის მეორე ტურში გადავიდნენ თინათინ ბერძენიშვილი, ირმა სოხაძე, ხათუნა ლაგაზიძე და ალექსანდრე ვახტანგოვი. თუმცა, ვახტანგოვმა კანდიდატურა მოხსნა და მხარი თინათინ ბერძენიშვილს დაუჭირა.

საზოგადოებრივი მაუწყებლის გენერალური დირექტორის თანამდებობა ვაკანტური მას შემდეგ გახდა, რაც ვასილ მაღლაფერიძემ თანამდებობა დატოვა. მაღლაფერიძის მტკიცებით, გადადგომის მიზეზი ის არის, რომ არ სურს წინასაარჩევნო პერიოდში გაჩნდეს კითხვები არხის მიკერძოებულობასთან დაკავშირებით.

გენერალურ დირექტორს თანამდებობაზე ნიშნავს სამეურვეო საბჭო ღია კონკურსის წესით, 6 წლის ვადით. ამასთან, საზოგადოებრივი მაუწყებლის დირექტორის ხელფასი 4 ათასი ლარიდან 10 ათას ლარამდე გაიზრდება. გადაწყვეტილება თანამდებობრივი სარგოს გაზრდაზე სამეურვეო საბჭომ ერთხმად დაამტკიცა.