სადღესასწაულო დღეებში, მეტრო და საბაგირო გზა რიყე-ნარიყალა, ასევე კუს ტბის საბაგირო მოქალაქეებს უფასოდ და შეცვლილი, გახანგრძლივებული გრაფიკით მოემსახურება. ამის შესახებ თბილისის მერმა დავით ნარმანიამ 28 დეკემბრის თბილისის მერიაში გამართულ მთავრობის სხდომაზე განაცხადა.

მერის თქმით, ახალი წლის ღამეს, 2016 წლის 31 დეკემბრის შუაღამის 12 საათიდან 2017 წლის პირველი იანვრის დილის 4 საათამდე, ასევე, შობას, 2017 წლის 6 იანვრის შუაღამის 12 საათიდან 2017 წლის 7 იანვრის 4 საათამდე, მეტროთი მგზავრობა უფასო იქნება. ამასთან, მოქალაქეები უფასოდ შეძლებენ გადაადგილებას საბაგირო გზით - რიყე-ნარიყალა და ჭავჭავაძის გამზირი - კუს ტბა, 2016 წლის 31 დეკემბრის 23 საათიდან 2017 წლის პირველი იანვრის 3 საათამდე.