როგორც ჩანს, მალე ქართველი მაყურებლებისთვის კარგად ნაცნობი სერიალის Prison Break (გაქცევა) გაგრძელებას ვიხილავთ.

რამდენიმე საათის წინ ამ ცნობილი ამერიკული შოუს მსახიობმა დომინიკ პარსელმა ინსტაგრამის პირად გვერდზე გამოქვეყნებული პოსტით დაადასტურა, რომ სერიალის მეექვსე სეზონს გადაიღებენ.

პარსელი, რომელიც სერიალში გაქცევა ერთ-ერთ მთავარ გმირს — ლინკოლნ ბაროუზს ასახიერებს, ინსტაგრამზე იუმორით მასთან დაკავშირებულ ჭორებს გასცა პასუხი:

"ჭორი N1: მოხუცი ვარ. დიახ, 50 წლის ვარ... ჭორი N2: მელოტი ვარ. არა, თავზე თმა სრულად მაქვს, უბრალოდ ხანდახან გადაპარსვა მიწევს. ჭორი N3: გაქცევის მეექვსე სეზონი გამოვა. ეს მართალია...", — ვკითხულობთ პოსტში.

ამ ფაქტმა ერთგული გულშემატკივრები იმდენად გაახარა, რომ მის ამ პოსტს უკვე ასი ათასზე მეტი მოწონება აქვს ინსტაგრამზე.

ჯერჯერობით სერიალის მწარმოებელ კომპანია Fox-ს ამასთან დაკავშირებით ოფიციალური განცხადება არ გაუვრცელებია, თუმცა ეს პირველი შემთხვევა არ არის, როცა მსახიობი სერიალის გაგრძელებასთან დაკავშირებით საჯაროდ წერს: გასულ თვეში პარსელმა განაცხადა, რომ სავარაუდოდ ამ წლის ოქტომბერში დაიწყებოდა მეექვსე სეზონის გადაღებები. მანამდე კი, ამ წლის დასაწყისში, ერთ-ერთ ფანთან საუბრისას აღნიშნა, რომ შოუს შემდეგ სეზონზე მოლაპარაკებები ნამდვილად მიმდინარეობდა.

ეს რას ნიშნავს, რომ ჩვენი საყვარელი გმირები ისევ ხათაბალაში გაეხვნენ?

ამას, ალბათ, მალე გავიგებთ.

ფოტო: Tumblr

გაქცევის პრემიერა 2005 წელს შედგა და მალევე მილიონობით მაყურებლის გული მოიგო მთელ მსოფლიოში. სერიალი მეოთხე სეზონით 2009 წელს დასრულდა, თუმცა 8 წლის შემდეგ ახალი, მეხუთე სეზონიც გადაიღეს და როგორც ჩანს, წინ ჯერ კიდევ გველოდება ამ დაძაბული კრიმინალური ისტორიის გაგრძელება.