პარტია გირჩის ლიდერის, ზურაბ ჯაფარიძის თქმით, ყოფილ პრეზიდენტს, მიხეილ სააკაშვილს ბიძინა ივანიშვილის დამარცხება იმაზე მეტად არ სურს, ვიდრე ძალაუფლების კვლავ ხელში ჩაგდება. მისი თქმით, ექსპრეზიდენტს ისიც არ სურს, ნაციონალურმა მოძრაობამ ივანიშვილი მის გარეშე დაამარცხოს.

"ერთადერთი რაც მას ამოძრავებს არის ძალაუფლების წყურვილი. "საერთოდ არ მინდა თანამდებობა", "მხოლოდ 2 წელი ვიქნები პრემიერი" — მსგავსი განცხადებები არის იაფფასიანი ბლეფი, რომელსაც მის პარტიაშიც კი არავინ ჭამს", — განაცხადა ჯაფარიძემ საკუთარ ფეისბუქ გევრდზე.

ჯაფარიძის თქმით, ოპოზიციური პარტიების, მათ შორის, ნაციონალური მოძრაობის პასუხისმგებლობაა, რომ ერთი მხრივ, ივანიშვილის მმართველობა დაასრულონ და მეორე მხრივ, არ დაუშვან ძალაუფლების ისევ სააკაშვილის ხელში კონცენტრაცია.

20 სექტემბერს, მიხეილ სააკაშვილმა TV პირველის ეთერში განაცხადა, რომ ის მხოლოდ საზოგადოების კოალიციას ხედავს და არ ხედავს პარტიულ კოალიციას. მისი თქმით "პოლიტიკური პარტიების და პარტიუკების" საერთოდ არ სჯერა. სააკაშვილმა, ასევე, აღნიშნა, რომ 2020 წლის საპარლამენტო არჩევნებზე უმრავლესობას ან ნაციონალური მოძრაობა აიღებს ან საქართველო "დაიღუპება". ამასთან, ჟურნალისტის კითხვას: "აქვს თუ არა ამომრჩეველს მხოლოდ ორი არჩევანი, თქვენ ან ბიძინა ივანიშვილი?" ყოფილმა პრეზიდენტმა უპასუხა, რომ ასეა და ეს ყველამ კარგად იცის.