ინფექციური საავადმყოფოს დირექტორის, თენგიზ ცერცვაძის განცხადებით, ის 10 წელია ქართული ოცნების მხარდამჭერია. მისი თქმით, ეს იყო გააზრებული გადაწყვეტილება და ვერ ხვდება, რა არის ამაში არაკორექტული.

"მე არ ვიცი, რატომ იყენებენ [კორონავირუსს წინასაარჩევნო და პოლიტიკურ კონტექსტში]. მე ათი წელია, მეტია, რაც ამ ჯგუფის მხარდამჭერი ვარ, ქართული ოცნების. კორონა საერთოდ ხსნებაში არ იყო მაშინ. რატომ გვეთვლება ეს მინუსად ან არაკორექტულ ქმედებად არ ვიცი", — განაცხადა თენგიზ ცერცვაძემ რუსთავი 2-ის ეთერში.

საუბრისას მან ახსენა ექიმი ვახტანგ კალოიანი, რომელიც ევროპული საქართველოს მაჟორიტარობის დეპუტატია და იკითხა, მის მიმართ რატომ არ არის კრიტიკა.

"იგივე ბატონი კალოიანი, რომელიც ჩემზე არანაკლებ პოპულარული ექიმია და არანაკლებ პროფესიონალი, რომელიც ღიად წავიდა პოლიტიკაში და დეპუტატობის კანდიდატია, ან ძალიან ბევრი ცნობილი ექიმი, რომელიც ღიად დადის მათ კრებებზე და საარჩევნო კომპანიებში და ღიად უჭერს მხარს, მათ მიმართ რატომ არ არის კრიტიკა? მათ რამე დააშავეს? ჩვენ რატომ დავაშავეთ?" — განაცხადა ცერცვაძემ.

თენგიზ ცერცვაძე ისევე, როგორც დაავადებათა კონტროლის ცენტრის ხელმძღვანელები და საკოორდინაციო საბჭოს სხვა წევრები არაერთხელ გააკრიტიკეს იმის გამო, რომ ქართული ოცნების წინასაარჩევნო აქტივობებს ესწრებიან. ოპოზიციაში აცხადებენ, რომ ხელისუფლება ამ ფორმით კორონავირუსის პანდემიას და ექიმების წვლილს მის შეკავებაში საარჩევნოდ ქულების დასაწერად იყენებს.

პოლიტიკური პარტია ქართული ოცნება 8 წლის წინ, 2012 წელს დაფუძნდა, მისი დამფუძნებელი ბიძინა ივანიშვილი კი პოლიტიკაში 2011 წელს, 9 წლის წინ გამოჩნდა.