ევროპული საქართველოს ერთ-ერთი ლიდერი, ფოთის, ხობისა და სენაკის მაჟორიტარობის კანდიდატი, გიგა ბოკერია, საერთაშორისო რესპუბლიკური ინსტიტუტის კვლევას ეხმიანება.

გიგა ბოკერიას თქმით, ამ კვლევაში, როგორც სხვა სანდო კვლევებში, ნათლად ჩანს მოსახლეობის ნება და მზაობა ცვლილებებისასთვის. ბოკერიამ აღნიშნა, რომ ცვლილებების შემდეგ, უნდა არსებობდეს კონკრეტული გეგმა, თუ როგორ გამოვა ქვეყანა ჩიხდან, ხოლო როგორც ბოკერია ამბობს, ევროპული საქართველოს ხედვა, სხვა პარტიებისაგან განსხვავებით, არის ორიენტირებული წინსვლაზე და ცვლილებებზე.

"მიუხედავად იმისა, რომ ეს კვლევა არის დაგვიანებული, რადგან აგვისტოს შუა რიცხვებშია ჩატარებული, ეს კვლევაც ასახავს იმ რეალობას, რომელიც ქვეყანაშია შექმნილი და რასაც ყველანი ვხედავთ. მოსახლეობის უდიდეს უმრავლესობას, ამ კვლევით, სურს ცვლილებები, ეს არის სწორედ ნება ჩვენი მოქალაქეების, რომ ასე გაგრძელება არ შეიძლება და არის კატასტროფის ტოლფასი, თუმცა არც უკან არ უნდა დავბრუნდეთ, როგორც ეს ზოგიერთ პოლიტიკურ ძალას სურს. ევროპული საქართველოს ხედვა არის წინსვლა და იმ ცვლილებებზე საუბარი მოქალაქეებთან, თუ როგორ გამოვალთ ამ მდგომარეობიდან ივანიშვილის დამარცხების შემდეგ", — განაცხადა გიგა ბოკერიამ.