ევროპული საქართველოს ერთ-ერთი ლიდერი, ფოთის, ხობისა და სენაკის მაჟორიტარობის კანდიდატი, გიგა ბოკერია, ლარის გაუფასურებასა და ეროვნული ბანკის პოლიტიკას ეხმიანება.

გიგა ბოკერიას თქმით, დღევანდელი ეკონომიკური კრიზისი არის ბიძინა ივანიშვილის და მისი ხელისუფლების არასწორი პოლიტიკის შედეგი. ბოკერიამ აღნიშნა, რომ იმის მაგივრად, ხელისუფლებას შეემცირებინა წნეხი მოქალაქეებზე, ბოლო წლებში მან გაზარდა გადასახადები, რამაც გააუარესა ქვეყნის ეკონომიკური მდგომარეობა.

გიგა ბოკერიას თქმით, დღეს ამ კრიზისიდან მთავარი გამოსავალი არის გარდამტეხი ცვლილებები და როგორც თავად ამბობს, ევროპული საქართველოს ხელკშეკრულებაში გაწერილია ყველა ის კონკრეტული გეგმა, რომელიც ქვეყანას ამოიყვანს ჭაობიდან და წაიყვანს წინ.

"ის, რაც ხდება დღეს ლარის კურსთან დაკავშირებით და ზოგადად, რაც ხდება ბოლო 8 წლის განმავლობაში ლარის მერყეობა, გაუფასურება, არის პირდაპირი შედეგი ივანიშვილის ხელისუფლების პოლიტიკის: გადასახადების აწევის, ბიუროკრატიის ზრდის, მავნებლური ინიციატივების, ამ უტიფრობის, როდესაც დღესაც გვეუბნება ივანიშვილი, რომ ყველაფერი კარგად არის და არაფრის შეცვლას არ აპირებს. ივანიშვილის ხელსიფლებაში დატოვება არის კატასტროფის ტოლფასი, რადგან ეს ყველაფერი, დღეს, პანდემიის ფონზე, არის საციცოცხლო საფრთხის მატარებელი საშუალო კლასისთვის, განსაკუთრებით გაჭირვებული მოქალაქეებისათვის და მთლიანად საქართველოს ეკონომიკისათვის".

ბოკერია აღნიშნავს, რომ ივანიშვილის დამარცხებისთანავე აუცილებლია გადასახადების დაწევა, კერძო საკუთრებაში ქონების დაბრუნება და ამ მიმართულებით რეალური რეფორმების გატარება, რათა ეკონომიკა გამოცოცხლდეს ქვეყანაში ვალუტა შემოვიდეს, სამუშაო ადგილები შეიქმნას და შემოსავალი გაიზარდოს.

"ივანიშვილს და მის კლოუნებს არ აქვთ არც უნარი და არც ხედვა, რომ ქვეყანა გამოიყვანონ ეკონომიკური კრიზისიდან", — ურთავს ევროპული საქართველოს ლიდერი, — "თუმცა აქვთ უტიფრობა, რომელმაც ქვეყანა ასეთ ჩიხში შეიყვანა. ამრიგად, ეროვნული ბანკის ჩარევა არაფერს არ შეცვლის, რომც დროებით რამე დასტაბილურდეს, ამას სჭირდება ხელისუფლების შეცვლა და იმ გეგმის განხორციელება, რაც აქვს ევროპულ საქართველოს, ანუ უნდა მოხდეს გარდამტეხი ცვლილებები. საჭიროა, გადასახადების დრამატული დაწევა და ეკონომიკის ამუშავება, რათა ქვეყანაში სამუშაო ადგილები შეიქმნას და შემოვიდეს ინვესტიციები. გარე ფაქტორები შეიძლება არსებობდეს, თუმცა ქვეყანას ჰყავს მთავრობა იმისთვის, რომ მათ ნაბიჯები თავად გადადგან. იმის მაგივრად, რომ მათ შეემცირებინათ გადასახადები, პირიქით გაზარდეს და ფუნდამენტურად უარი თქვეს წნეხის შემცირებაზე, მათ შორის განსაკუთრებული გაჭირვების, პანდემიის დროსაც".

"ამრიგად, თუ არ მოხდა გარდამტეხი ცვლილებები, ვერ შეიცვლება მდგომარეობა. ჩვენ ხელშეკრულებაში, სადაც კონკრეტული პუნქტებია ჩამოწერილი, აღებული გვაქვს ვალდებულება, რომ შევასრულებთ მათ და ქვეყანაში მოვიტანთ გარდამტეხ ცვლილებებს", — აღნიშნავს გიგა ბოკერია.