რუსთავში ორი პირი პოლიციისთვის წინააღმდეგობის გაწევისა და მათთვის საქმიანობაში ხელის შეშლის გამო დააკავეს. ამის შესახებ ინფორმაცია შინაგან საქმეთა სამინისტრომ გაავრცელა.

შსს-ს ცნობით, სამართალდამცავებმა პატრულირებისას საცხოვრებელი კორპუსის მიმდებარედ 20-მდე ურთიერთდაპირისპირებული ახალგაზრდა შენიშნეს და წესრიგის დაცვისკენ მოუწოდეს. უწყების ცნობით, რამდენიმე მონაწილე პოლიციის მოთხოვნას არ დაემორჩილა და სამართალდამცავებს ფიზიკური და სიტყვიერი შეურაცხყოფა მიაყენა.

შსს-ს ინფორმაციით, საქმეზე გამოძიება საქართველოს სისხლის სამართლის კოდექსის 353-ე მუხლის მე-2 ნაწილით მიმდინარეობს, რაც ჯგუფის მიერ პოლიციის მიმართ წინააღმდეგობას, საზოგადოებრივი წესრიგის დაცვისთვის ხელის შეშლასა და მისი საქმიანობის შეწყვეტის ან შეცვლის მიზნით ჩადენილ ძალადობას გულისხმობს.