ქართული ოცნების ლიდერი, ირაკლი კობახიძე IRI-ს კვლევას მორიგ ჯერზე აკრიტიკებს და კვლევის შემსრულებელ ორგანიზაციას უთავმოყვარეოს უწოდებს.

"როდესაც რომელიმე კვლევითი ორგანიზაცია აცხადებს იმას, რომ 27 პროცენტზე მეტისგან ვერ გაიგო ვის უჭირს მხარს, ასეთი ორგანიზაცია შეიძლება პირდაპირ უთავმოყვარეოდ ჩაითვალოს. კვლევებში ძალიან კარგად ვერკვევი", — განაცხადა კობახიძემ.

მისივე მტკიცებით, ასეთი ორგანიზაციები საერთაშორისო პარტნიორებს სწორ ინფორმაციას არ აწვდიან.

"მე არ ვიცი IRI-სა და NDI-ს კვლევები, მე ვიცი CRRC-ისა და აიფიემის კვლევები, რომლებიც არამხოლოდ რეალობასთან არის აცდენილი, ერთმანეთთანაც არის აცდენილი. როცა ერთი კომპანია გიდებს 27 პროცენტს და მეორე 60 პროცენტს და ამხელა სხვაობაა, იქ ციფრები თავის თავზე მეტყვეებს. CRRC და აიფიემი არაა ის ორგანიზაციები, რომლებიც ჩვენს ძალიან მნიშვნელოვან პარტნიორებს მიაწოდებენ სწორ ინფორმაციას", — აღნიშნა კობახიძემ.

IRI-ს კვლევა დაიწუნა პარლამენტის თავმჯდომარე არჩილ თალაკვაძემ. მისი აზრით, ეს კვლევა არ ასახავს სრულფასოვან სინამდვილეს, ამიტომ ის მოუწოდებს მოსახლეობას, ის კვლევები ნახონ, სადაც ქართული ოცნება 56%-იანი მხარდაჭერით სარგებლობს.

საერთაშორისო რესპუბლიკური ინტიტუტის (IRI) კვლევის მიხედვით, მომავალ კვირას რომ არჩევნები იყოს, 33% ხმას ქართულ ოცნებას მისცემდა, 15% ნაციონალურ მოძრაობას, 4% ევროპულ საქართველოსა და სტრატეგია აღმაშენებელს. ამასთან 3 პროცენტი ამბობს, რომ არც ერთ პარტიას არ დაუჭერდა მხარს, ხოლო 23 პროცენტმა არ იცის ან კითხვაზე პასუხი არ გასცა.