ევროპის საინვესტიციო ბანკის მხარდაჭერით სტიქიის შედეგების ლიკვიდაცია, დედაქალაქის მდგრადი განვითარება და მუნიციპალური ტრანსპორტი-ეს ის ძირითადი საკითხებია, რაზეც დღეს, 25 თებერვლს გამართულ შეხვედრაზე თბილისის მერმა დავით ნარმანიამ და ევროკავშირის ელჩმა საქართველოში იანოშ ჰერმანმა ისაუბრეს.

დედაქალაქის მერიის ინფორმაციით, შეხვედრაზე თბილისში წამოწყებულ პროექტებში ევროკავშირის ინსტიტუტის მხრიდან თბილისის დახმარების შესაძლებლობა განიხილეს. როგორც ნარმანიამ აღნიშნა, საუბარი მუნიციპალური ტრანსპორტისათვის საგრანტო კომპონენტის გამოყოფაზე ერთობლივ მუშაოაბასაც შეეხო.

“ასევე ვისაუბრეთ დედაქალაქის მერიის ჩართულობაზე ევროპის დღის აღნიშვნასთან დაკავშირებულ ღონისძიებებში, რაშიც ტრადიციულად ვმონაწილეობთ “ , - განაცხადა ნარმანიამ.

ევროკავშირის ელჩის თქმით, მნიშვნელოვანია იმ პროექტების განხორციელება, რომელიც საქართველოსა და ევროკავშირს შორის ასოცირების შეთანხმების მიზნების მიღწევას ემსახურება.

“განვიხილეთ ჰაერის დაბინძურების შემცირების საკითხები. ისინი საბოლოოდ ემსახურება საქართველოსა და ევროკავშირს შორის ასოცირების შეთანხმების მიზნების მიღწევას. რა თქმა უნდა, პრობლემების მოგვარება, იქნება ეს საცობები თუ სხვა რამ, ერთ დღეში ვერ მოხდება. საჭიროა ხანგრძლივი, ინტენსიური და კომპლექსური მუშაობა “ , - განაცხადა ჰერმანმა.