ევროპული საქართველოს მაჟორიტარობის კანდიდატი ქუთაისში, ოთარ კახიძე, ქუთაისის მერიის კორუფციულ სქემებზე საუბრობს. კახიძის თქმით, ქუთაისის მერიამ დააორგანიზა კორუფციული სქემა და ქალაქის ბიუჯეტიდან მილიონები მოიპარეს, ამავდროულად, ინფასტრუქტურული სამუშაოები შეასრულეს უხარისხოდ.

კახიძემ აღნიშნა, რომ აუდიტის სამსახურმა გამოავლინა ეს დარღვევები, თუმცა დღემდე საოლქო პროკურატურას არავინ არ უთქვამს, ვინც მოიპარა რამდენიმე მილიონი ქალაქის ბიუჯეტიდან.

"სახელმწიფო აუდიტის სამსახურმა 2019 წელს გამოავლინა მასშტაბური კორუფციის ფაქტები ქუთაისის მერიაში. ქუთაისის მერიამ ე.წ. სოციალური საცხოვრისის 2 მილიონ-ნახევრიანი ტენდერის პირობები მოარგო კონკრეტული იურიდიული პირის, შპს სანოს ინტერესებს.

მიუხედავად იმისა, რომ დამატებითი ფართის შესყიდვას კონკურსის პირობები და მოთხოვნები არ ითვალისწინებდა, მერიამ შპს სანოს დამატებით გადაუხადა 1 მლნ 800.000 ლარი.

მერიამ სოციალური საცხოვრისი შეისყიდა არასაბაზრო ფასად. წარმოდგენილი ექსპერტიზის დასკვნის თანახმად, სოციალური საცხოვრისის შენობის 1მ2 ფართის საბაზრო ღირებულება შეადგენს 540 ლარს, მაშინ როდესაც მერიამ გადაიხადა 1 000 ლარი. შესაბამისად, ექსპერტის დასკვნით დათვლილ ღირებულებასა და მერიის მიერ ჩაბარებულ სამუშაოების ღირებულებას შორის სხვაობა შეადგენს 2 მლნ ლარს",— აცხადებს კახიძე.

მისივე თქმით, გარდა იმისა, რომ კორუფციული სქემა დააორგანიზეს და ბიუჯეტიდან მილიონები მოიპარეს, მერიამ სოციალური საცხოვრისი მოაწყო უხარისხოდ და შენობა ვერ აკმაყოფილებს საცხოვრებლის ფუნქციებს, მოსახლეობისთვის არ არის შექმნილი შესაბამისი პირობები.

"პარლამენტში ანგარიშის განხილვისას, აუდიტის სამსახურის უფროსმა განმარტა, რომ დასკვნა პროკურატურაში იყო გაგზავნილი და რეაგირება მათ უნდა მოეხდინათ.

მივმართავ გენერალურ და საოლქო პროკურატურას — უკვე წელიწადზე მეტი გავიდა, რატომ არ არის გამოვლენილი ქუთაისის მერიის არცერთი თანამდებობის პირი, ვინც მიითვისა ბიუჯეტის მილიონები?

ვის და რატომ აფარებენ ხელს?" — განაცხადა ოთარ კახიძემ.