ეროვნულ-დემოკრატიული ინსტიტუტის (NDI) კვლევის მიხედვით, გამოკითხულთა 36%-სთვის კონკრეტული პარტიისთვის ხმის მიცემისას ყველაზე მნიშვნელოვანი საკითხი ეკონომიკური პოლიტიკაა. მეორე ადგილზეა პარტიის პოზიცია ჯანდაცვასთან დაკავშირებით (12%) და პარტიის პოზიცია კანონის უზენაესობასთან დაკავშირებით. 10%-სთვის ხმის მიცემისას ყველაზე მნიშვნელოვანია პარტიის პოზიცია ეროვნულ უსაფრთხოებასთან დაკავშირებით (10%). 7% აქვს განათლების საკითხებზე პარტიის პოზიციას, ხოლო 5% — საგარეო საკითხებზე.

ამასთან, გამოკითხულთა 56% ამბობს, რომ ურჩევნია პარტია დაჰპირდეს დაბალ გადასახადებს, 27% — უფრო მაღალ პენსიებს. 50%-ის თქმით, პარტიის ან კანდიდატის არჩევისას, ურჩევნია პარტია, რომელიც აქცენტს აკეთებს პროფესიულ ტრენინგებზე, 25% — ფორმალურ განათლებაზე.

NDI-ს კვლევის ყველა ინტერვიუ ჩატარდა სატელეფონო მეთოდით. გამოიკითხა 2 045 ადამიანი საველე სამუშაოები მიმდინარეობდა 6-11 აგვისტოს. კვლევის საშუალო ცდომილების ზღვარია +/- 1.3%.

ორგანიზაციის განცხადებით, რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით შეირჩნენ. NDI-ს ინფორმაციით, ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. მათივე თქმით, კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით).