სტრატეგია აღმაშენებლის ერთ-ერთმა ლიდერმა, სერგო ჩიხლაძემ პარტიაში შექმნილ მდგომარეობასთან დაკავშირებით ისაუბრა და აღნიშნა, რომ კორონავირუსი მის არც ერთ თანაგუნდელსა და თანამშრომელს არ დაუდასტურდა.

ჩიხლაძის განცხადებით, პარტიის ოფისებში დაცულია უსაფრთხოების ყველა წესი, შეზღუდულია დახურულ სივრცეში ადამიანების რაოდენობა, თანამშრომლების ნაწილი გადასულია დისტანციურ მუშაობაზე და ამომრჩეველთან შეხვედრაც მკაცრი რეგულაციების დაცვით მიმდინარეობს.

"ჩვენს პარტიაში შექმნილ მდგომარეობასთან დაკავშირებით, გუშინ 50-მდე თანაგუნდელმა გაიარა ლუგარის ლაბორატორიაში ტესტირება. ჩვენი სათაო ოფისისა და საბურთალოს ოფისის არც ერთ წევრს კორონავირუსი არ დაუდასტურდა. ოფისის სამი წევრი, მათ შორის პიარის სამსახურის ხელმძღვანელი ირაკლი გაბისონია, მიუხედავად ტესტის უარყოფითი პასუხისა, რამდენიმე დღის განმავლობაში ექიმების დაკვირვების ქვეშ იმყოფება. ისინი რამდენიმე დღით მოთავსებულები იქნებიან საკარანტინე სივრცეში. დღეს, დამატებით 40-მდე თანამშრომელი ლუგარის ცენტრში ტესტირებას გაივლის. დიდი მადლობა დაავადებათა კონტროლის ცენტრის ეპიდემიოლოგებს, რომლებიც დღე და ღამე მუშაობენ და აქტიურ კომუნიკაციაში არიან ჩვენთან, რათა დროულად და მყისიერად დაიგეგმოს ამ ადამიანების ტესტირება. ამავე დროს, ჩვენი ძალებით ჩვენს დაქვემდებარებაში მყოფ ყველა ოფისში სადეზინფექციო სამუშაოები ჩავატარეთ. ასე რომ, საფრთხეები მინიმიზირებულია და შესაბამისად, პერსონალთან მიმართებაში და ზოგადად, შენობაში მკაცრი რეგულაციებით ხდება მიღება: სავალდებულოა პირბადეების ტარება, დეზობარიერის გამოყენება, ხელების სადეზინფექციო ხსნარით დამუშავება და ა.შ. ასევე, შეზღუდულია ოფისში თანამშრომლების რაოდენობაც და ვიცავთ უსაფრთხოების ყველა წესს", — განაცხადა სერგო ჩიხლაძემ.