ევროპული საქართველოს მაჟორიტარობის კანდიდატი გორსა და კასპში, ლევან თარხნიშვილი, დამოუკიდებელი წევრების არჩევასთან დაკავშირებით ცესკოს გადაწყვეტილებას ეხმიანება და მას არაკანონიერს უწოდებს.

ლევან თარხნიშვილის თქმით, ცენტრალურმა საარჩევნო კომისიამ მიიღო არაკანონიერი გადაწყვეტილება და დამოუკიდებელ წევრებად დანიშნა ქართულ ოცნებასთან აფილირებული პირები. თარხნიშვილი მოუწოდებს საარჩევნო ადმინისტრაციას, "ნუ ჩაჰყვებიან ბიძინა ივანიშვილს პოლიტიკურ სამარეში".

"დღეს ჩვენ შევიკრიბეთ საბურთალოს საოლქო კომისიის წინ, რათა გაგვეფრთხილებინა კომისია და მთლიანად საარჩევნო ადმინისტრაცია, რომ ნუ ჩაიდენენ უკანონობას და ნუ ჩაჰყვებიან პოლიტიკურ სამარეში ბიძინა ივანიშვილს და ქართულ ოცნებას. საუბარია იმაზე, რომ პარტიებზე ერთად გავაპროტესტეთ ცესკოს მიერ ე.წ. დამოუკიდებელი წევრების არჩევა — როგორც აღმოჩნდა, 73 ადამიანიდან, 42 დაკავშირებულია ქართულ ოცნებასთან ან სამხედრო სტრუქტურებთან, რაც პირდაპირ კანონის დარღვევაა.

დღეს იგივე პროცესი დაიწყო საოლქო კომისიებში. ჩვენ საბურთალოს საოლქო კომისიის წინ გავაკეთეთ განცხადება და გავაფრთხილეთ, რომ გვაქვს სია იმ ადამიანების, რომლებიც დაკავშირებულები არიან ქართულ ოცნებასთან და მოვუწოდეთ საოლქო კომისიას, რომ არ აერჩიათ კონკრეტული წევრები, მიუხედავად ზეწოლისა. პირველი შედეგი არის ის, რომ 11:00 საათზე ჩანიშნული კომისიის სხდომა გადადეს 12:00 საათზე, ალბათ, იმიტომ, რომ კონსულტაციებს გადიან.

იგივეს გაკეთებას ვაპირებთ სხვა ოლქებთანაც, სადაც საოლქო კომისიის სხდომები იმართება. იგივეს გავაკეთებთ და ზოგადადაც ვაფრთხილებთ ყველას, რომ იქნება ეს საარჩევნო ადმინისტრაციის მოხელე, მუნიციპალიტეტის თანამშრომელი, პოლიციელი, სუს-ის თანამშრომელი თუ უბრალოდ აქტივისტი, ნუ ჩაიდენენ უკანონობას, ნუ ჩაჰყვებიან პოლიტიკურ სამარეში ბიძინა ივანიშვილს და ქართულ ოცნებას, რადგან ხალხის დაკვეთა არის გარდამტეხი ცვლილებები და ვინც ამ გარდამტეხ ცვლილებებს წინ აღუდგება, აუცილებლად დამარცხდება პოლიტიკურად", — განაცხადა თარხნიშვილმა.