რამდენიმე წუთის წინ მსოფლიოში ერთ-ერთი ყველაზე ცნობილი კინომოვლენა — ვენეციის საერთაშორისო ფესტივალი დაიხურა. წლევანდელი ფესტივალის ათდღიანი მარათონი დასრულდა და მთავარი პრიზი, ოქროს ლომი ჩინელი რეჟისორის ქლოი ჩჟაოს ფილმს Nomadland გადაეცა.

შეგახსენებთ, რომ გასულ წელს იმავე პრიზით ტოდ ფილიპსის გახმაურებული კინოსურათი Joker დაჯილდოვდა.

ვენეციის კინოფესტივალის წლევანდელ ჟიურის ქეით ბლანშეტი ხელმძღვანელობდა. მასთან ერთად გამარჯვებულების გამოვლენაში მონაწილეობა მიიღეს ჟიურის წევრებმა ვერონიკა ფრანცმა (ავსტრიელი რეჟისორი ფილმისა Goodnight Mommy), იოანა ჰოგმა (ბრიტანელი რეჟისორი ფილმისა The Souvenir), ნიკოლა ლაგოიამ (იტალიელი სცენარისტი), კრისტიან პეცოლდმა (გერმანელი რეჟისორი ფილმისა Phoenix) და მეთ დილონმა (ფილმ Crash-ის მსახიობი).

მთავარ ნომინაციებში გამარჯვებულების სია ასე გამოიყურება:

ოქროს ლომი საუკეთესო ფილმისთვის — ქლოი ჩჟაოს Nomadland;

ვერცხლის ლომი საუკეთესო რეჟისურისთვის — კიოში კუროსავას Wife of a Spy;

საუკეთესო სცენარი — ჩაიტანია ტამანეს The Disciple;

საუკეთესო მსახიობი ქალი — ვანესა კირბი ფილმით Pieces of a Woman;

საუკეთესო მსახიობი კაცი — პიერფრანჩესკო ფავინო ფილმით Padrenostro;

ჟიურის გრანპრი — მიშელ ფრანკოს New Order.

ფრენსის მაკდორმანდი ფილმში Nomadland, რომელსაც ვენიციის წლევანდელ კინოფესტივალზე მთავარი ჯილდო გადაეცა.

ფოტო: JOSHUA RICHARDSON/SEARCHLIGHT PICTURES

ვენეციის 2020 წლის კინოფესტივალი გამკაცრებული უსაფრთხოების ზომების დაცვით, ნაკლები ხალხმრავლობით და ფიზიკური დისტანცირებით გაიმართა, თუმცა მისმა ორგანიზატორებმა მაინც შეძლეს, რომ მძიმე კარანტინის შემდეგ კინომოყვარულები გაეხარებინათ, გეგმები ბოლომდე არ ჩაეშალათ და იტალიის ისტორიულ ქალაქში კიდევ ერთხელ ტრადიციულად ეზეიმათ კინოს დიდებულება.