რამდენიმე დღის წინ ცნობილი გახდა, რომ წლევანდელი კანის ფესტივალის ჟიურის თავჯდომარე ამერიკელი რეჟისორი, სპაიკ ლი იქნება — 73-წლიანი ისტორიის მქონე ფესტივალს პირველად ეყოლება ჟიურის შავკანიანი თავმჯდომარე.

სულ ახლახანს კი ვენეციის კინოფესტივალმაც დაასახელა იმ ადამიანის ვინაობა, ვინც წელს ჟიურის უხელმძღვანელებს — მსახიობი ქეით ბლანშეტი. გასულ წელს ჟიურის თავმჯდომარე არგენტინელი რეჟისორი, ლუკრეცია მარტელი იყო და სწორედ მისი მეთაურობით დასახელდა ფილმი Joker გასული წლის ფესტივალის საუკეთესო კინოსურათად.

ჟიურის თავმჯდომარედ ქეით ბლანშეტის დასახელებისას ვენეციის ფესტივალის დირექტორმა, ალბერტო ბარბერამ განაცხადა:

"ქეით ბლანშეტი უბრალოდ თანამედროვე კინოს საკულტო ფიგურა არ არის, რომელსაც დიდებული რეჟისორები და ნებისმიერი გემოვნების კინომანები გასული 20 წლის განმავლობაში აღმერთებდნენ. მისმა დამოკიდებულებამ სახელოვნებო და ფილანთროპიული საკითხების მიმართ მთელი საზოგადოება შთააგონა: ის ერთდროულადაა გარემოს დამცველი და კინოინდუსტრიაში, რომელიც კვლავ პატრიარქალური რწმენებით იმართება, ქალების ემანსიპაციის მხარდამჭერი. მისი უსაზღვრო სამსახიობო ნიჭი, რომელშიც შერწყმულია უნიკალური ინტელექტი და კინოს მიმართ გულწრფელი ვნება, ჟიურის თავმჯდომარისთვის საჭირო იდეალური თვისებაა."

ქეით ბლანშეტი კანის 2018 წლის ფესტივალზე ჟიურის დანარჩენ წევრებთან ერთად.

ფოტო: ALBERTO PIZZOLI/AFP/GETTY IMAGES

ქეით ბლანშეტი მერვე ქალი იქნება, რომელიც 77-წლიანი ისტორიის მქონე კინოფესტივალის ჟიურის უხელმძღვანელებს. მანამდე 2018 წელს ის ასევე კანის ფესტივალის ჟიურის თავმჯდომარე იყო.

"ეს ერთ-ერთი ყველაზე ატმოსფერული კინოფესტივალია მთელ მსოფლიოში — პროვოკაციული და შთამაგონებელი გარემო კინოს ნებისმიერი ფორმისთვის. ჩემთვის პრივილეგია და სიამოვნებაა, რომ წელს ჟიურის თავჯდომარე ვიქნები", — განაცხადა მსახიობმა.

ქეით ბლანშეტი ოსკარების ორგზის მფლობელია ფილმებისთვის The Aviator (2004) და Blue Jasmine (2013) და ასევე ამავე დაჯილდოებაზე ნომინირებული იყო სხვადასხვა დროს კიდევ ხუთჯერ.

ვენეციის 77-ე კინოფესტივალი 2-12 სექტემბერს გაიმართება.

ასევე იხილეთ: