ევროპულმა საქართველომ ქუთაისში პარტიის მაჟორიტარობის და მერობის კანდიდატები წარადგინა.

მოსახლეობას მიმართეს პარტიის ლიდერებმა, მათ შორის გიორგი კანდელაკმა.

გიორგი კანდელაკის თქმით, ქართული ოცნების ხელისუფლებამ ქუთაისი წაიყვანა უკან და მას მძიმე ეკონომიკური კრიზისი მოუტანა.

"თუკი არსებობს ამ ქვეყანაში ქალაქი, რომელიც ყველაზე მეტად დაზარალდა ქართული ოცნების და ივანიშვილის მმართველობით, პირველ რიგში ეს არის ქუთაისი. ასევე ძალიან დაზარალდა წყალტუბო. 1 წლის წინ, ბიძინა ივანიშვილმა თქვა, რომ ააყვავებდა წყალტუბოს, რომ იქ დაცარიელებულ სასტუმროებს გახსნიდა ხელახლა და წყალტუბო აივსებოდა ტურისტებით. ყველა სხვა დაპირებასთან ერთად, ეს დაპირებაც აღმოჩნდა ტყუილი. დღეს ქუთაისის აეროპორტი, რომელიც დაეხმარა ძალიან ბევრ ადამიანს, რომ გამართულიყო წელში, არის სრულიად დაკეტილი. მრავალი ადამიანი დგას სიღარიბის ზღვარზე", — განაცხადა გიორგი კანდელაკმა.

კანდელაკმა აღნიშნა, რომ ევროპულ საქართველოს აქვს კონკრეტული გეგმა, თუ როგორ მოუტანოს როგორც ქუთაისს, ისე მთლიან საქართველოს გარდამტეხი ცვლილებები.

"ქართული ოცნების დამარცხების შემდეგ, გაიხსნება სხვადასხვა მსხვილი ავიაკომპანიის ბაზა ქუთაისის აეროპორტში, რაც იქნება გარდამტეხი ქუთაისის აეროპორტისათვის. ასევე აუცილებლად გაიხსნება სატვირთო ტერმინალი, რომელიც გაზრდის იმერეთის საექსპორტო პოტენციალს. დღეს არის ცვლილებების დრო და ევროპულ საქართველოსთან ერთად ეს ცვლილებები აუცილებლად დადგება", — აღნიშნა გიორგი კანდელაკმა.