იმერეთში, სახელმწიფო რწმუნებულის ზვიად შალამბერიძის განცხადებით, ქუთაისში 2 ადამიანის კორონავირუსი, ბულვარში დადგმული საველე ლაბორატორიაში გამოუვლინდა და ორივე მათგანი 32 სკოლის წყაროს უკავშირდება.

"დღეს ქუთაისში დაგვიფიქსირდა 21 დადასტურებული შემთხვევა, კარგია ის რომ ჩვენ სიტუაციას სრულად ვაკონტროლებთ, ამ 21-დან აღსანიშნავია ორი ადამიანი, რომელსაც კორონავირუსი კარავში დაუდგინდათ და ეს ადამიანები არიან 32-ე საჯარო სკოლის კონტაქტები", — განაცხადა ზვიად შალამბერიძემ.

12 სექტემბრის მონაცემებით, საქართველოში კორონავირუსის 158 ახალი შემთხვევა გამოვლინდა, გამოჯანმრთელებულთა რიცხვი კი 9-ით გაიზარდა. ამის შესახებ ინფორმაცია დაავადებათა კონტროლის გვერდზე განახლდა.