ქართული ოცნების ხელისუფლების ყველაზე ხანგრძლივმოქმედი მინისტრი თეა წულუკიანი პარტიულ სიაშია. ამის შესახებ დღეს, 10 სექტემბერს პარტიამ ოფიციალურად განაცხადა.

"თეა წულუკიანი არის საქართველოს მთავრობის ერთადერთი წევრი, რომელსაც 2012 წლიდან აქვს მინისტრობის უწყვეტი სტაჟი. [...]

თეა არის გამორჩეული პოლიტიკური, მენეჯერული და ექსპერტული გამოცდილების მქონე ადამიანი, რომელიც განსაკუთრებული შენაძენი იქნება საქართველოს პარლამენტისთვის", — განაცხადა ქართული ოცნების საარჩვენო შტაბის ხელმძღვანელმა და პარტიული სიის მესამე ნომერმა, ირაკლი კობახიძემ.

2010 წლიდან წულუკიანი იყო ირაკლი ალასანიას თავისუფალი დემოკრატების თავმჯდომარის მრჩეველი ადამიანის უფლებათა დარგში, მოგვიანებით კი თავმჯდომარის მოადგილე. 2012 წლის ოქტომბრის საპარლამენტო არჩევნებში კოალიცია ქართული ოცნებიდან ნაძალადევის რაიონის მაჟორიტარი დეპუტატი გახდა და კოალიციიდან ალასანიას გუნდის გასვლის შემდეგ, ქართულ ოცნებაში დარჩა.

წულუკიანი უკვე 8 წელია იუსტიციის მინისტრია და მის სახელს უკავშირდება არაერთი გახმაურებული საქმე. მათ შორის, ევროსასამართლოს მოსამართლეების შერჩევა, ყოფილი მაღალჩინოსნების, მიხეილ სააკაშვილის, ზურაბ ადეიშვილის და დავით კეზერაშვილის საქმეები, რუსთავი 2-ის საქმე და დავა თანამშრომლებთან, რომლებთანაც სასამართლოს ყველა ინსტანცია წააგო.

ქართული ოცნების განახლებულ პროპორციულ სიაში მოხვდნენ როგორც ძველი, ისე ახალი სახეები. მათ შორის პირველ ოცეულში ყოფილი სპორტსმენებიც არიან.

პრემიერობის კანდიდატი და სიის პირველი ნომერი გიორგი გახარიაა. მეორე ნომრად პარლამენტის მოქმედი თავმჯდომარე, არჩილ თალაკვაძე დაასახელს.

ნახეთ სრული სია:

  1. გიორგი გახარია;
  2. არჩილ თალაკვაძე;
  3. ირაკლი კობახიძე;
  4. თეა წულუკიანი;
  5. მამუკა მდინარაძე;
  6. კახა კუჭავა;
  7. გიორგი კახიანი;
  8. მარიამ ქვრივიშვილი;
  9. მიხეილ სარჯველაძე;
  10. მაია ბითაძე;
  11. მიხეილ დაოშვილი;
  12. გიორგი ამილახვარი;
  13. ვიქტორ სანიკიძე;
  14. მაკა ბოჭორიშვილი;
  15. შალვა პაპუაშvილი;
  16. დავით კაჭარავა;
  17. ნიკოლოზ სამხარაძე;
  18. გიორგი ხელაშვილი;
  19. მარიამ ლაშხი;
  20. ბექა დავითულიანი.

ამავე თემაზე: