ევროპული საქართველოს მაჟორიტარობის კანდიდატი ზუგდიდის ოლქში, გიგი უგულავა, ზუგდიდში, სოხუმის ქუჩაზე, დევნილების დასახლებას ესტუმრა და დევნილების პრობლემები მოისმინა.

ერთ-ერთი დევნილის, მარინა გაბისონიას თქმით, ის ცხოვრობს გაუსაძლის მდგომარეობაში, არ აქვს კომუნალური საჭიროებები, ხოლო მთავრობა მას ყურადღებას არ აქცევს. გიგი უგულავამ აღნიშნა, რომ უნდა დასრულდეს დევნილების სოციალურ და ეკონომიკურ სიდუხჭირეში ცხოვრება, რასაც გარდამტეხი ცვლილებები სჭირდება.

"მორიგი არაადეკვატურობის პიკია ეს შენობა, ჯანდაცვის სამინისტროს ჰგონია, რომ აქ ხალხი არ ცხოვრობს და ეს შენობა დალუქულია. ეს ის პარალელური და ვირტუალური რეალობაა, რომელსაც უყვებიან ივანიშვილს, თუმცა სინამდვილე სხვა არის. აქ ხალხი ცხოვრობს უკვე 30 წელიწადია და რეგისტრირებული კიდევ უფრო ბევრია. ხალხი ცხოვრობს სიდუხჭირეში თავიანთ ოჯახებთან ერთად და ბუნებრივია, ამ ადამიანების წუხილი, რომ სახლები რომლებიც შენდება გვერდით გვარამიას ქუჩაზე, ნაწილდება არასამართლიანად", — აღნიშნავს უგულავა.

მისი თქმით, დაახლოებით 2 წელია საჭირო, რომ კომპაქტურად ჩასახლებების ეპოქა დასრულდეს. "ზოგადად, ერთადერთი საკითხია, რომელიც არც გადადებას ითხოვს და რომლის ტემპიც უნდ იყოს ასმაგი. ყველაზე სწრაფად, რაც ამ ქვეყანაში უნდა გაკეთდეს ესაა — დაახლოებით 2 წელია საჭირო, რომ კომპაქტურად ჩასახლებების ეპოქა დასრულდეს. ყველა საერთაშორისო ორგანიზაცია წამოყვება ნებისმიერ ნორმალურ მთავრობას ამ წინადადებაზე. დევნილის სტატუსი უნდა იყოს მხოლოდ პოლიტიკური სტატუსი და დევნილი ბავშვი არ უნდა იზრდებოდეს სხვა ბავშვებისგან განსხვავებულ გარემოში. ამას სჭირდება გარდამტეხი ცვლილებები, სწრაფად მომუშავე მთავრობა, რომელსაც ქართული საზოგადოება აირჩევს ამ არჩევნებზე", — განაცხადა გიგი უგულავამ.