როგორც ჩანს, ფეისბუქი საახალწლოდ შესვენებას არ აპირებს და საკუთარი მომხმარებლის გაოცებას განაგრძობს. დღეიდან შეგვიძლია მესენჯერის ახალი ფუნქცია - ჯგუფური ვიდეოჩატი გამოვიყენოთ. აპლიკაციის განახლების შემთხვევაში ეს ფუნქცია გააქტიურდება როგორც ანდროიდის, ასევე iOS ოპერაციულ სისტემაზე მომუშავე მოწყობილობებზე.

ფოტო: Stephane Taine

ვიდეოზარი სმარტფონებისთვის უკვე რამდენიმე წელია ხელმისაწვდომია, თუმცა თუ გაიხსენებთ, თავად რამდენად იშვიათად გისარგებლიათ ამ შესაძლებლობით, მიხვდებით, რომ ვიდეოზარმა თავის დროზე დამკვიდრება ვერ მოახერხა. თუმცა, გარემოებები იცვლება, ადამიანები უფრო და უფრო ხშირად ირჩევენ წერის ნაცვლად კომუნიკაციის სხვა საშუალებებს (ხმოვანი მესიჯი, ზარი). მესენჯერის ვიდეოფუნქციას ყოველთვიურად დაახლოებით 245 მილიონი ადამიანი იყენებს, ამიერიდან კი მომხმარებლებს შეუძლიათ საუბარში ერთი კი არა, რამდენიმე ადამიანი ჰყავდეთ ჩართული კამერის საშუალებით. როგორც ფეისბუქის გუნდი აღნიშნავს, ეს გააადვილებს ჯგუფურად მოგზაურობის დაგეგმვას, ან სიახლის გაზიარებას ერთდროულად ყველა მეგობრისთვის.

ჯგუფური ვიდეოჩატის დროს ეკრანზე მაქსიმუმ 6 ადამიანი ჩანს, თუმცა ჩატში შემოერთება უბრალოდ საყურებლად ან ხმოვანი რეპლიკების გასაკეთებლად 50-მდე მომხმარებელს შეუძლია.