ევროპული საქართველოს ლიდერი, დავით ბაქრაძე, ქართული ოცნების საარჩევნო პარტიულ სიაზე განცხადებას აკეთებს.

დავით ბაქრაძის თქმით, ქართული ოცნების სიაში შევლენ ის ლიდერები, რომლებმაც ქვეყანა მძიმე ეკონომიკურ კრიზისში ჩააყენეს. ბაქრაძემ აღნიშნა, რომ ქართული ოცნების სიაში იქნებიან ახალი სახეებიც, რათა საზოგადოებას შეექმნას სიახლის ილუზია, თუმცა, როგორც ბაქრაძე ამბობს, ეს ილუზია ვერ მოაგვარებს კრიზისს და მთავარია ქვეყანაში დადგეს გარდამტეხი ცვლილებები.

"ქართული ოცნება არის პოლიტიკური გუნდი, რომელმაც ქვეყანა შეიყვანა ძალიან ღრმა ეკონომიკურ კრიზისში, უიმედობაში და ვერ სთავაზობს გამოსავალს ამ გაჭირვებიდან და პრობლემებიდან. ამიტომ, როგორც არ უნდა დაკომპლექტდეს საბოლოოდ სია, ნათელია, რომ ამ სიაში იქნებიან ის პოლიტიკური ლიდერები, ვისი პასუხისმგებლობაცაა დღეს ქვეყანაში შექმნილი უმძიმესი ეკონომიკური კრიზისი და ფონი. რა თქმა უნდა, იქნებიან ნულოვანი წონის მქონე ახალი სახეები, რომელთა ერთადერთი ამოცანა იქნება ამ სიის გაფერადება და სიახლის ილუზიის შექმნა. თუმცა, ეს ილუზია ვერ მოაგვარებს კრიზისს, ვერ წაიყვანს ქვეყანას წინ, ამიტომ გამოსავალი არის ერთადერთი, მთლიანად ამ გუნდზე უარის თქმა და ამ არჩევნების გამოყენება იმისათვის, რომ ქვეყანაში დადგეს გარდამტეხი ცვლილებები", — განაცხადა დავით ბაქრაძემ.