დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ინფიცირების შემთხვევებს, რაც ახლა გვაქვს, თავისუფლად გავუძლებთ. ამის შესახებ მან საკოორინაციო საბჭოს შემდეგ განაცხადა.

"რაც ახლა გვაქვს შემთხვევები, ამას თავისუფლად გავუძლებთ. ჩვენ არ გვინდა გვქონდეს ასეულები, თორემ სამი ათეული, ორი ათეული, ხუთი ათეული, ამას გავუძლებთ. მთავარია, რომ ეს პროცესი ქვეყანაში მართვადია", — განაცხადა გამყრელიძემ.

მისივე თქმით, დღევანდელი ეპიდემიოლოგიური მდგომარეობა პროგნოზირებადი იყო.

"ვპროგნოზირებდით, რომ აგვისტოს ბოლოს, სექტემბრის დასაწყისში გვექნებოდა შემთხვევების ზრდა ქვეყანაში ძირითადად ადგილობრივი და იმასაც ვპროგნოზირებდით, რომ ეს ყველაფერი აჭარიდან დაიწყებოდა, რადგან იქ იყო ამის ნიშნები. იგივე სერიოზული გამოცდა გველის ახლა ჩვენ. მობილობის დიდი ზრდა იქნება სწავლის დაწყებისას მომავალ კვირაში", — განაცხადა დაავადებათა კონტროლის ცენტრის ხელმძღვანელმა.

მისივე თქმით, ქვეყანა ახლა გამოცდას გადის, თუმცა ყველაფერი მართვადია.

9 სექტემბრის მონაცემებით, საქართველოში კორონავირუსის 44 ახალი შემთხვევა გამოვლინდა, გამოჯანრთელდა 4 ადამიანი. მონაცემები StopCov-ზე განახლდა.

ინფექციური საავადმყოფოს სამედიცინო დირექტორის, მარინა ეზუგბაიას თქმით, 44 ახალი შემთხვევიდან 7 დონასთან არის დაკავშირებული, 12 ბათუმთან, 12 დადასტურებულ შემთხვევათა კონტაქტებია, 2 ეპიდკერაში მოგზაურობის ისტორიის მქონე პირია, ხუთი შემოტანილი შემთხვევაა, სამი სამედიცინო პერსონალია და სამის წყაროს ეძებენ.

ჯამში, საქართველოში კორონავირუსის დადასტურებულ შემთხვევათა რაოდენობა 1 773-მდე გაიზარდა, ამათგან 1 325 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: