პარტია გამარჯვებული საქართველოს ლიდერმა, ირაკლი ოქრუაშვილმა პალიტრანიუსის ეთერში განაცხადა, რომ ისანში მაჟორიტარის წარდგენას არ გამორიცხავს. თავად ოქრუაშვილი საბურთალოს ოლქის მაჟორიტარობის კანდიდატია.

"აუცილებლად წარვადგენთ მაჟორიტარებს ქართლის ორივე რეგიონში, გურიაში, აჭარაში თავისთავად და არ გამოვრიცხავ, რომ, ასევე, ისანში. ისანში, სადაც, მე ვთვლი, რომ გიორგი ვაშაძის მხრიდან ჩემთან მიმართებაში იყო დარღვეული შეთანხმება და თან, მითუმეტეს, ამაზე გარკვეული კონსულტაციები მქონდა და სრული თავისუფლება მაქვს მიღებული სხვა მონაწილეებისგან იმ მაგიდისა, რომელიც ლეიბორისტული პარტიის ოფისში იყო და შეიძლება ჩვენ წარვადგინოთ ჩვენი კანდიდატი ისნის საარჩევნო ოლქში", — განაცხადა ოქრუაშვილმა.

ოქრუაშვილი ამ გადაწყვეტილების მიზეზად კონკურენციასა და კოალიციური მმართველობის დროს პარლამენტში როლის გაზრდას ასახელებს.

"პრაგმატული მიზენებიდან გამომდინარე. ყველა ცდილობს მის ყულაბაში გაცილებით მეტი ხმა მოიზიდოს და სწორია ეს. კონკურენციაა, ჩვენ კონკურენტები ვართ, გარდა იმისა, რომ ვთანხმდებით რაღაც მიზნებზე. [ყველა ცდილობს] თავის ყულაბაში მოიზიდოს, რაც შეიძლება მეტი ხმა, რომ შემდეგ მისი როლი პარლამენტში უკვე, როდესაც კოალიციურ მმართველობაზე მიდგება საქმე, გახდეს წონადი არამარტო ძალიან პრიმიტიული მიდგომით, არამედ მთავარი რამით", — განაცხადა გამარჯვებული საქართველოს ლიდერმა.

19 ივნისს ისნის ოლქში გაერთიანებულმა ოპოზიციამ მაჟორიტარი დეპუტატობის კანდიდატად გიორგი ვაშაძე წარადგინა, 27 ივლისს კი ცნობილი გახდა, რომ გიორგი ვაშაძემ და თაკო ჩარკვიანმა პოლიტიკურ პარტიათა კოალიცია, ძალა ერთობაშია დატოვეს და ახალი პოლიტიკური პლატფორმა, სტრატეგია აღმაშენებელი წარადგინეს.

18 აგვისტოს გაერთიანებულმა ოპოზიციამ საბურთალოს ოლქში მაჟორიტარი დეპუტატობის კანდიატად ირაკლი ოქრუაშვილი დაასახელა, რაზეც ოქრუაშვილმა განაცხადა, რომ მისი წარდგენა ოპოზიციის შეთავაზება იყო. მისივე თქმით, არჩევნებში მისი მთავარი კონნკურენტი ბიძინა ივანიშვილია. ოქრუაშვილმა, ასევე, განაცხადა, რომ იყო სხვადასხვა შემოთავაზება, თუმცა მან მიიღო გადაწყვეტილება, ყველაზე რთულ ადგილას წასულიყო.

26 აგვისტოს ერთიანმა ნაციონალურმა მოძრაობამ ისანში მაჟორიტარი დეპუტატობის კანდიდატად ხატია დეკანოიძე დაასახელა, რაზეც გიორგი ვაშაძემ განაცხადა, რომ ნაციონალურმა მოძრაობამ კვლავ გატეხა სიტყვა.