საქართველოს ყოფილმა პრეზიდენტმა და ნაციონალური მოძრაობის პრემიერობის კანდიდატმა, მიხეილ სააკაშვილმა მორიგი წინასაარჩევნო მიმართვა გაავრცელა, რომელშიც ხელისუფლებაში ყოფნის დროს დაშვებულ შეცდომებზე ისევ ისაუბრა. სააკაშვილმა ხაზი გაუსვა დაშვებულ შეცდომებს და ამტკიცებდა, რომ სურს ისინი გამოასწოროს.

"წარმატება არ არსებობს სამართლიანობის გარეშე, მე ვიცი რომ ჩვენ დროსაც ბევრი პრობლემა იყო ამასთან მიმართებაში ჩვენ ვიყავით ზედმეტად ხისტი და ზოგჯერ უსამართლო და შემდეგ ეს ტენდენცია გაუარესდა და გაგრძელდა", — განაცხადა მიხეილ სააკაშვილმა.

ამის შემდეგ სააკაშვილმა მოსახლეობას საარჩევნო პროგრამა და დაპირებებიც გააცნო. მისი მტკიცებით, გაპრემიერებას მხოლოდ 2 წლით გეგმავს და აპირებს, მთლიანად შეცვალოს საგამოძიებო და სასამართლო სისტემა.

სააკაშვილმა საქართველოში დაბრუნება არაერთხელ დააანონსა. მათ შორის, ექსპრეზიდენტი აქტურად პირდებოდა მოსახლეობას დაბრუნებას წინასაარჩევნო პერიოდებში, თუმცა ამ დრომდე არ ჩამოსულა. მის წინააღმდეგ საქართველოში რამდენიმე სისხლის სამართლის საქმეზე განაჩენია გამოტანილი და ის დამნაშავედაა ცნობილი.

წინასაარჩევნო პერიოდში მორიგი დაპირების გაჟღერების შემდეგ, მმართველ გუნდში, ქართულ ოცნებაში განაცხადეს, რომ მიხეილ სააკაშვილს საქართველოში ჩამოსვლის შემთხვევაში ციხე ელის.

ამავე თემაზე: