ნაციონალური მოძრაობის პრემიერმინისტრობის კანდიდატი მიხეილ სააკაშვილი ამტკიცებს, რომ ხელისუფლებაში არეულობით მოსვლას არ აპირებს. ეს სიტყვები მან სხვა წინასაარჩევნო დაპირებებთან ერთად გააჟღერა.

"მე ჩამოვალ ისეთ პირობებში, როდესაც ეს არ გამოიწვევს დაპირისპირებას და რაღაც სახის არეულობას, იმიტომ რომ ძალიან მნიშვნელოვანია, ყველაფერი იყოს მშვიდობიანად. მე თავის დროზე ხელისუფლება გადავაბარე მშვიდობიანად და ნამდვილად არ ვაპირებ არეულობით ხელისუფლებაში მოსვლას", — აცხადებს სააკაშვილი ვიდეომიმართვაში, რომელიც უკრაინიდან ჩაწერა.

სააკაშვილმა საქართველოში დაბრუნება არაერთხელ დააანონსა. მათ შორის, ექსპრეზიდენტი აქტურად პირდებოდა მოსახლეობას დაბრუნებას წინასაარჩევნო პერიოდებში, თუმცა ამ დრომდე არ ჩამოსულა. მის წინააღმდეგ საქართველოში რამდენიმე სისხლის სამართლის საქმეზე განაჩენია გამოტანილი და ის დამნაშავედაა ცნობილი.

წინასაარჩევნო პერიოდში მორიგი დაპირების გაჟღერების შემდეგ, მმართველ გუნდში, ქართულ ოცნებაში განაცხადეს, რომ მიხეილ სააკაშვილს საქართველოში ჩამოსვლის შემთხვევაში ციხე ელის.

ამავე თემაზე: