"მობრძანდეს, მობრძანდეს", — ასე ეხმაურება საქართველოს პრემიერმინისტრი, გიორგი გახარია მიხეილ სააკაშვილის "დაბრუნების გეგმასთან" დაკავშირებით გაკეთებულ განცხადებას. ამ თემაზე სხვა კომენტარი მას არ გაუკეთებია.

საქართველოს ექსპრეზიდენტმა, მიხეილ სააკაშვილმა 6 სექტემბერს თავის ფეისბუქზე დაწერა, რომ მისი დაბრუნების გეგმასთან დაკავშირებით მორიგ მიმართვას ხვალ გააკეთებს.

მან ბოლო ვიდეომიმართვა 27 აგვისტოს ფეისბუქზე გაავრცელა, სადაც ის ქართველებს ჩამოსვლას ჰპირდება და ბოდიშს უხდის. ვიდეომიმართვა ქართულმა ოცნებამ საკუთარ ფეისბუქგვერდზე გააზიარა წარწერით "Miha hamodiii". ქართული ოცნების ირონიულ პოსტს ევროპული საქართველო გამოეხმაურა და დაწერა: "თუ ამ წრეზე ტრიალი მოგბეზრდა, გამოსავალი ევროპული კოალიციაა." გამოწვევას მალევე გირჩის ლიდერი, ზურა ჯაფარიძეც შეუერთდა წარწერით — "shesha ar ari".