საქართველოში 31 ოქტომბერში გასამართ საპარლამენტო არჩევნებს NDI დისტანციურ რეჟიმში დააკვირდება. ორგანიზაციის განცხადებით, ისინი NDI-ს პრეზიდენტ, დერეკ მიტჩელის ხელმძღვანელობით ვირტუალურად ჩატარებულ წინასაარჩევნო ანალიზსა და საერთაშორისოდ აღიარებულ სადამკვირვებლო სტანდარტებს დაეყრდნობიან. მათივე ცნობით, ამასთანავე, NDI, ტრადიციულად, მჭიდროდ ითანამშრომლებს ადგილობრივ და საერთაშორისო პარტნიორებთან.

"სექტემბრის პირველი ნახევრიდან NDI-ის გრძელვადიანი ანალიტიკოსების მისია მუშაობას შეუდგება ისეთ საკვანძო საარჩევნო საკითხებზე, როგორიცაა: საარჩევნო ადმინისტრაცია, პოლიტიკური კამპანიები, გენდერი და ნაკლებად წარმოდგენილი ჯგუფების ჩართულობა, მედია და დეზინფორმაცია. NDI გამოსცემს შუალედურ ანგარიშს, რომელიც წინასაარჩევნო ანალიზსა და ადგილობრივ და საერთაშორისო დამკვირვებლებთან მჭიდრო თანამშრომლობის შედეგად მიღებულ ინფორმაციას დაეფუძნება", — აცხადებენ ორგანიზაციაში.

არჩევნებიდან რამდენიმე დღეში კი NDI მესამე ანგარიშს გამოსცემს, რომელიც არჩევნებამდე ორი კვირით ადრე ვირტუალურ რეჟიმში NDI-ს პრეზიდენტ დერეკ მიტჩელის ხელმძღვანელობით გამართულ მაღალი დონის შეხვედრებს დაეყრდნობა.

ორგანიზაციაში აღნიშნავენ, რომ საერთაშორისო დამკვირვებლების მისიის ჩამოყვანასთან დაკავშირებული რისკები არა მხოლოდ საქართველოში, არამედ მსოფლიოში არსებულ მდგომარეობაზეც არის დამოკიდებული. გლობალური პანდემია კვლავ არ ექვემდებარება კონტროლს ბევრ ქვეყანაში, მათ შორის ამერიკის შეერთებულ შტატებში, რის გამოც გადაწყვიტეს საერთაშორისო სადამკვირვებლო მისია ოქტომბრის არჩევნებისთვის არ გამოგზავნონ.

საპარლამენტო უმრავლესობის წევრმა, ირაკლი კობახიძემ 31 აგვისტოს განაცხადა, რომ კორონავირუსის პანდემიის გამო NDI-სა და IRI-ს დამკვირვებლების არჩამოსვლის საკითხი განიხილება. თუმცა, მისივე თქმით, დიდი რაოდენობით დამკვირვებლებს ელოდებიან ეუთოდან, ოდირიდან და სხვა საპარლამენტო ასამბლეებიდან.