პარლამენტის თავდაცვისა და უსაფრთხოების კომიტეტის თავმჯდომარის, ირაკლი სესიაშვილის თქმით, ლუგარის ლაბორატორიაზე კიბერთავდასხმა, დიდი ალბათობით, რუსეთის სპეცსამსახურების მიერაა ორგანიზებული.

სესიაშვილი ამბობს, რომ ეს, რა თქმა უნდა, ჰიბრიდული ომის ნაწილია და მისი ამოცანა, პროპაგანდა და დეზინფორმაციაა.

"მეთოდოლოგია ძალიან ცნობილია, იპარავ ინფორმაციას, დიდ ნაწილს ავთენტურად აქვეყნებ და ავთენტურობის ხარისხზე შემდეგ უკვე ფალსიფიცირებულ ინფორმაციას ავრცელებ და ცდილობ, რომ ამ მართალი ინფორმაციით ტყუილი დააჯერო მომხმარებელს", — აცხადებს სესიაშვილი.

დღეს, 3 სექტემბერს საქართველოს შინაგან საქმეთა სამინისტრომ გაავრცელა ინფორმაცია, რომ ჯანდაცვის სამინისტროს კომპიუტერულ სისტემაზე უცხო ქვეყნის სპეცსამსახურების მიერ კიბერშეტევა განხორციელდა. უწყებაში აღნიშნეს, რომ მართლსაწინააღმდეგოდ დაეუფლნენ ლუგარის ლაბორატორიის მონაცემებსაც, რაც ამ დროისთვის ერთ-ერთ უცხოურ ვებ-გვერდზე ხელმისაწვდომია. შსს არ აკონკრეტებს, რომელი ქვეყნის სპეცსამსახურებზე საუბრობს.