ჯანდაცვის მინისტრის მოადგილის თამარ გაბუნიას, თქმით დღეიდან ონკოლოგიური პაციენტებისთვის ახალი პროგრამის განხორციელება იწყება. პაციენტებს ვისაც სჭირდებათ ქიმიოთერაპია, ჰორმონოთერაპია, სხივური თერაპია და სიმსივნის საწინააღმდეგო მედიკამენტები, უფასოდ მიიღებენ.

"მაღალი ხარისხის ახალი თაობის მედიკამენტებით პაციენტები უზრუნველყოფილები იქნებიან. პროგრამის ფარგლებში ცვლილება შეეხო პროგრამით გათვალისწინებული მოცულობის გაზრდას რვა ათასი ლარით, როგორც მოგეხსენებათ საყოველთაო ჯანდაცვის პროგრამის ფარგლებში არის ბაზისური პაკეტით მოსარგებლეთა ჯგუფი, ვისთვისაც აქამდე განსაზღვრული შეღავათი ამ კონკრეტული სერვისებისთვის შეადგენდა 12 ათას ლარს და არის კიდევ მეორე ჯგუფი, შედარებით გაფართოებული პაკეტის მფლობელები, რომელშიც შედიოდნენ ბავშვები, ასაკით პენსიონერები, შეზღუდული შესაძლებლობების მქონე ბავშვები, ასევე მკვეთრად შეზღუდული შესაძლებლობების მქონე პირები და სტუდენტები. მათთვის ქიმიოთერაპია და სხივური თერაპიისთვის განსაზღვრული თანხის მოცულობა შეადგენდა 15 ათას ლარს დღევანდელი ცვლილებით რვა ათასი ლარი ემატება ორივე პაკეტს ანუ თანხის მოცულობა იზრდება ერთ შემთხევაში 20 ათას ლარამდე ხოლო მეორე შემთხვევაში 23 ლარამდე", — განაცხადა გაბუნიამ.

ჯანდაცვის მინისტრის მოადგილის თქმით, პაციენტებს ამ პროგრამით სარგებლობა მარტივად შეეძლებათ.

"აქ იქნება კოორდინირებული მოქმედება საყოველთაო ჯანდაცვის პროგრამის და ასევე რეფერალური პროგრამის ფარგლებში ძალიან მარტივი მექანიზმით ასე რომ პაციენტს არ მოუწევს ზედმეტი ბიუროკრატიის გავლა იმისთვის, რომ ჰქონდეს სრული დაფინანსება", — განაცხადა გაბუნიამ.

20 აგვისტოს მთავრობის სხდომის დასრულების შემდეგ, ეკატერინე ტიკარაძემ განაცხადა, რომ ონკოლოგიური დაავადებების მქონე ადამიანებს სახელმწიფო პრეპარატებს სრულიად დაუფინანსებდა.

"ცვლილება ეხება იმ მნიშვნელოვან პრეპარატებს, რომელიც არის თანამედროვე მიდგომებით და ძალიან ეფექტური. დღემდე ფინანსედებოდა ამ პრეპარატების მხოლოდ გარკვეული ეტაპი და ძალიან ხშირი იყო ისეთი შემთხვევები, როდესაც ჩვენი მოქალაქეებს საბოლოო ეტაპზე ვერ ახერხებდნენ მკურნალობას. ჩვენ ვიცით, რომ დაავადების ბოლო ეტაპზე ეს არის ძალიან რთული და სწორედ აქედან გამომდინარე, მივიღეთ გადაწყვეტილება, რომ სახელმწიფო იღებს თავის პასუხისმგებლობას ჩვენი მოქალაქეები ამ რთულ პერიოდში დააფინანსოს. პრეპარატების ახალი თაობა, რომელიც არის ყველაზე ეფექტური ამ დაავადებასთან ბრძოლაში, ხელმისაწვდომი იქნება ყველა იმ მოქალაქისთვის, ვისაც ეს სჭირდება", — განაცხადა ეკატერინე ტიკარაძემ.

მისი ინფორმაციით, დღეს საქართველოში 38 000-ზე მეტი ონკოპაციენტია და ახალი პროგრამა, რომელიც თითოეულზე დამატებით 8 000 ლარის ღირებულების პრეპარატების გამოყოფას ითვალისწინებს, 2019 წელს შექმნილი სამუშაო ჯგუფის მიერ შემუშავდა.