მთავარ პროკურატურასთან თამარ ბაჩალიაშვილის ოჯახის წევრების აქცია იმართება. მათი მოთხოვნა საქმის მკვლელობის მუხლად გადაკვალიფიცირებაა.

თამარ ბაჩალიაშვილის დედის, თეონა მაზაშვილის განცხადებით, მომხდარში 3 მაღალჩინოსანია ჩარეული და საქმეს ჯგუფური მკვლელობის კვალიფიკაცია უნდა მიენიჭოს. მისი განცხადეით, თამარს ჰქონდა ინფორმაცია ყარაბაღის კონფლიქტზე, კერძოდ, იმის შესახებ, რომ ქართველი მაღალჩინოსნები აზერბაიჯანს იარაღით ამარაგებდნენ.

"აზერბაიჯანისა და თურქეთის მთავრობებს მოვუწოდებ დაინტერესდნენ და საქართველოს მთავრობას მოსთხოვონ იმ 3 მაღალჩინოსანის შესახებ არსებული ფაილები, რომელიც ჩემმა შვილმა შემთხვევით გახსნა და გაშიფრა ის სქემა თუ როგორ მარაგდებოდა ყარაბაღის ომი იარაღით. ზუსტად მაგიტომ გადაარიცხინეს ჩემს შვილს მილიონები სხვადასხვა კომპანიებიდან, რადგან იარაღის შესაძენად, მოგეხსენბათ დიდი თანხა სჭირდება. სუსიც სწორედ ამიტომ არის ჩართული ჩემი შვილის მოშორების ამბავში", - განაცხადა გარდაცვლილის დედამ.

ოჯახის განცხადებით, აქციების გაგრძელება იგეგმება სექტმბრის შუა რიცხვებიდან, თუ ის მოთხოვნები არ დაკმაყოფილდება, რაც მათ აქვთ. ოჯახი საგამოძიებო უწყებისგან საქმეში FBI-ს ჩართვას მოითხოვს. ასევე, მათი მოთხოვნაა პროკურატურამ სახელმწიფო უსაფრთხოების სამსახურის სამი ავტომობილის გადაადგილების ამსახველი სრული ჩანაწერი გაასაჯაროვონ.

თვალი ადევნეთ On.ge-ს პირდაპირ ეთერს აქციიდან:

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

ჯერ კიდევ ძებნის პროცესში გამოძიებამ ამოიღო ბაჩალიაშვილის კომპიუტერი, თუმცა ოჯახი აცხადებდა, რომ მისი გახსნა ვერ შეძლეს. მოგვიანებით კი მამამ მედიასთან თქვა, რომ პოლიციელის თქმით, მისი შვილი "დიდ შარში იყო". ოჯახის ადვოკატი კომპიუტერის გახსნის პროცესზე დასწრებას ითხოვდა, თუმცა, მიხეილ რამიშვილის განცხადებით, ლუქი მის გარეშე მოხსნეს.

ამავე თემაზე: