ევროპული საქართველოს მაჟორიტარობის კანდიდატი გურჯაანის, საგარეჯოს, დედოფლისწყაროსა და სიღნაღის ოლქში, გიორგი ღვინიაშვილი, სიღნაღელებს მიმართავს.

გიორგი ღვინიაშვილის თქმით, დღეს უკიდურესი სიღარიბეა, გაძვირებულია პროდუქტები, გაუფასურებულია ლარი, ამ დროს კი ადამიანები მიტოვებული არიან ხელისუფლებისაგან. გიორგი ღვინიაშვილი აღნიშნავს, რომ ცვლილებების გზა ოქტომბრის არჩევნებზე გადის და მოუწოდებს მოსახლეობას არჩევნებზე მისვლისაკენ.

"ჩემო სიღნაღელებო, მე ვარ გიორგი ღვინიაშვილიაშვილი და წარმოვადგენ ევროპულ საქართველოს ოქტომბრის საპარლამენტო არჩევნებზე სიღნაღში. ქართული ოცნების 8-წლიანმა მმართველობამ ქვეყანა მიიყვანა სიღარიბემდე, ადამიანების უკიდურეს გაჭირვებამდე, ფასებისა და კრიმინალის ზრდამდე, ჯანდაცვისა და განათლების სისტემების ჩავარდნამდე.

დღეს ქვეყანაში ფასები ყველაფერზე იზრდება, თუმცა არ იზრდება ფასები თქვენ მიერ მოყვანილ პროდუქტზე, ყურძნის ფასი ყოველ წელს იკლებს, განსაკუთრებით ამ გაუფასურებული ლარის პირობებში, დღეს გლეხი მიტოვებულია უპატრონოდ, ბედის ანაბარად. თქვენ ყველას გახსოვთ, ვისაც შეხება გქონიათ ყურძენთან და ქარხანასთან, ჩემი გუბერნატორობის პირობებში, 24 საათის განმავლობაში ვიდექი თქვენთან ერთად და ვიცავდი თქვენ უფლებებს.

ჩემი გამარჯვების შემთხვევაში, გპირდებით, რომ ვიქნები თქვენ გვერდით და არავის მივცემ უფლებას თქვენ დაგჩაგროთ. დღეს ბევრ ადამიანს რწმენა აქვს დაკარგული და განსაკუთრებით გულსატკენია, როდესაც ეს ახალგაზრდობას ეხება. ისინი ხშირად, ლუკმა-პურის საშოვნელად ტოვებენ თავიანთ ოჯახებს და მიდიან საზღვარგარეთ.

მე გპირდებით სიღნაღელო ახალგაზრდებო, რომ თქვენს რაიონში იპოვით თქვენს ღირსეულ ადგილს. გექნებათ სამუშაო, შეკრებისა და გართობის ადგილები და, რა თქმა უნდა, ჩვენ გავაგრძელებთ ჩვენი ულამაზესი ქალაქის, სიღნაღის, განვითარებას.

ბრძოლას აზრი აქვს, ჩვენ შეგვიძლია რომ ცუდი შევცვალოთ უკეთესით, ამიტომ მოდით არჩევნებზე, დამიჭირეთ მხარი და ერთად ვიცხოვროთ მდიდარ და დაცულ საქართველოში", — განაცხადა გიორგი ღვინიაშვილმა.