ადგილობრივი ე.წ. სახელისუფლებო მედია, რეს-ის ცნობით, ოკუპირებულ ცხინვალის დე ფაქტო შს მინისტრი, იგორ ნანიევი თანამდებობიდან გადააყენეს. Eurasia Daily-ს ინფორმაციით, ამ გადაწყვეტილების მიზეზი წინასწარი დაკავების იზოლატორში 28 წლის, ინალ ჯაბიევის გარდაცვალება გახდა, რომელსაც დე ფაქტო მინისტრის მანქანისთვის ცეცხლის გახსნის ბრალდებით რამდენიმე დღის წინ დააკავეს. გარდაცვლილის ახლობლების თქმით, მას ციხეში აწამებდნენ. ასევე, დაკავებულია ჯაბიევის ძმა.

დე ფაქტო მინისტრის თანამდებობიდან გადაყენების შესახებ თეატრის მოედანზე შეკრებილებს ე.წ. სამხრეთ ოსეთის დე ფაქტო პრეზიდენტმა, ანატოლი ბიბილოვმა განუცხადა. მისივე თქმით, ჯაბიევის მკვლელობასთან დაკავშირებით სისხლის სამართლის საქმე აღიძრა.

სოციალური ქსელის მომხმარებლები წერენ, რომ ჯაბიევი მილიციაში დაკითხვის დროს ცემით მოკლეს. მომხდართან დაკავშირებით ცხინვალის ცენტრალურ მოედანზე ასობით ადამიანი, მათ შორის დე ფაქტო პარლამენტის დეპუტატები და სხვადახვა სამსახურის წარმომადგენლები შეიკრიბნენ.

ოკუპირებული ცხინვალის ე.წ. შინაგან საქმეთა მინისტრის, იგორ ნანიევის სამსახურეობრივ ავტომანქანას ცეცხლი 18 აგვისტოს გაუხსნეს.