პირველი საუნივერსიტეტო კლინიკის დირექტორის, ლევან რატიანის განცხადებით, შატილის გზაზე დაშავებულთა მდგომარეობა კვლავ სტაბილურად მძიმეა.

"უარყოფითი დინამიკა ბოლო რამდენიმე საათია არ ვლინდება, პირიქით, ჰემოდინამიკის პარამეტრები ხდება უფრო სტაბილური წინა რამდენიმე საათთან შედარებით. ასევე, კლინიკური ლაბორატორიული კვლევები, რომელიც რამდენიმე საათის წინ გაკეთდა იქაც არ ვლინდება უარყოფითი დინამიკა", — აცხადებს ლევან რატიანი.

ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. გარდაიცვალა 17 ადამიანი, 3 კი მძიმედ დაშავდა. შინაგან საქმეთა სამინისტრომ მომხდარ ფაქტზე გამოძიება საქართველოს სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.