მმართველი გუნდის ლიდერის, მამუკა მდინარაძის განცხადებით, თუ პატრიოტთა ალიანსს ოკუპანტი ქვეყნიდან დაფინანსების ფაქტი დაუდასტურდება, ამას მოყვება შესაბამისი რეაგირება.

"უნდა მოჰყვეს" — განაცხადა დეპუტატმა რუსთავი 2-თან დოსიეს გამოძიების შეფასებისას.

მდინარაძე ამ თემაზე საუბრისას გამოეხმაურა ევროპული საქართველოს ლიდერის, სერგი კაპანაძის განცხადებასაც, რომელმაც აღნიშნა, რომ პატრიოტთა ალიანსის საქმეზე გამოძიება უნდა დაიწყოს, თუმცა არ აქვს იმედი, რომ "ქართული ოცნება თავის სატელიტ პარტიას პატრიოტთა ალიანსს რაიმე პრობლემას შეუქმნის".

"ე.წ. ევროპული საქართველოს წარმომადგენლები რომ ბრაზდებიან, ჯერ თვითონ გაიხსენონ როგორ უღალატეს თავის ქვეყანას და როგორ დაუჭირეს მხარი რეზოლუციას, სადაც ეწერა, თითქოს ქართულმა სამხედრო ძალებმა დაიწყეს ომი აგვისტოს", — განაცხადა მდინარაძემ.

ცენტრ დოსიეს განკარგულებაში აღმოჩნდა სამუშაო დოკუმენტები, ანალიტიკური ანგარიშები, ფინანსური შეფასებები, წინასაარჩევნო მეთოდები და საოპერაციო მოხსენებები გენერალ ჩერნოვის სამდივნოდან. მათი განცხადებით, ამ დოკუმენტებით ირკვევა, თუ რას წარმოადგენს ე.წ. რბილი ძალა, რომელიც კრემლიდან იმართება. საგამოძიებო მასალაში ამტკიცებენ, რომ პატრიოტთა ალიანსი წინასაარჩევნოდ რუსეთიდან ფინანსდება და ამისთვის 8 მილიონია გამოყოფილი.

"ამჯერად თემა ეხება საქართველოში დაგეგმილ ოქტომბრის არჩევნებს. როგორც დოკუმენტებიდან ირკვევა, კრემლი ფსონს ირმა ინაშვილსა და დავით თარხან-მოურავზე დებს, რომლებიც აქტიურად აკრიტიკებენ ნატოსა და აშშ-ს. უკვე შედგენილია მრავალმილიონიანი წინასაარჩევნო ბიუჯეტი და დამონტაჟებულია სააგიტაციო ვიდეო რგოლი. ხოლო პატრიოტთა ალიანსის პოპულარიზაციისთვის პოლიტ ექსპერტი სერგეი მიხეევი და მოსკოვური კომპანია POLITSECRETS დაიქირავეს.

თავად მიხეევს კი გენერალ ჩერნოვის ხალხი კურირებს, ეფ ეს ბეს პოლკოვნიკი ვალერი მაქსიმოვი და გე ერ უს ოფიცერი ვალერი ჩერნიშოვი", — წერია დოსიეს მასალაში.

დოსიე აქვეყნებს დოკუმენტს, რომელიც მათი განცხადებით, წყარომ მიაწოდა. მათი თქმით, ამ დოკუმენტში ასახულია გეგმა და ხარჯთაღრიცხვა პატრიოტთა ალიანსის კამპანიისთვის.

დოსიე აქვეყნებს კიდევ ერთ დოკუმენტსაც. მათი თქმით, წყარო ადასტურებს, რომ ეს არის პატრიოტთა ალიანსის მიერ შემუშავებული ხარჯთაღრიცხვა 4-თვიანი საარჩევნო კამპანიისთვის.

პატრიოტთა ალიანსის დეპუტატი ირმა ინაშვილი ამტკიცებს, რომ რუსეთიდან დაფინანსებას არ იღებს. მისი თქმით, საგამოძიებო მასალაში 8-მილიონიანი დაფინანსება იმიტომ ახსენეს, რომ მისი პარტიის საარჩევნო ნომერი არის 8.

"ეს არის აბსოლუტური აბსურდი. რვა მილიონიანი ბიუჯეტის განხილვა საერთოდ არ ყოფილა. რვა მილიონი, ალბათ, იმიტომ აიღეს, რომ ჩვენი საარჩვენო ნომერი რვა არის. ჩვენი საარჩევნო ნომერი 41 რომ ყოფილიყო, ალბათ, 41 მილიონიან ბიუჯეტს გაგვიანგარიშებდნენ და 41 მილიონს დაგვაბრალებდნენ", — განაცხადა ინაშვილმა ბრიფინგზე.