საპატრიარქომ განცხადება გაავრცელა, სადაც სრულიად საქართველოს კათოლიკოს-პატრიარქმა ხევსურეთში ავარიის შედეგად დაღუპულთა ოჯახებს სამძიმარი გამოუცხადა.

"დიდია ჩვენი მწუხარება ხევსურეთში, სოფელ ბისოსთან, ა.წ. 23 აგვისტოს მომხდარი ტრაგიკული შემთხვევის გამო, რომელსაც 17 ადამიანი ემსხვერპლა და რომელმაც მთელი საქართველო შეძრა. გვინდა, ყველა ოჯახს გამოვუცხადოთ სამძიმარი და მიუხედავად ასეთი მძიმე განსაცდელისა, ვუთხრათ, რომ უნუგეშობას არ უნდა მიეცნენ.

ღმერთმა ყველა განგამტკიცოთ და მოგმადლოთ ურყევი რწმენა მარადიული ჭეშმარიტი ცხოვრებისა, რომლის მკვიდრნიც ჩვენი შვილები - ახლადგარდაცვალებულნი გუშინ გახდნენ.აღვავლენთ ლოცვებს მათი უკვდავი სულისათვის, რათა უფალმან სავანესა მართალთასა დააწესოს ისინი, ხოლო დაშავებულთ შეეწიოს და გადაარჩინოს", — ნათქვამია საპატრიარქოს მიერ გავრცელებულ სამძიმარში.